亞洲天王保衞戰！南韓孫興民終於打番出水準，周六為熱刺上陣有波入，主場3比1擊敗諾定咸森林。白禮頓雖然被列斯聯迫和2比2，但日本三笘薰依然交足貨，走上走落威脅力極大，兩個入波都關佢事。
三笘薰今季喺英超大放異彩，孫興民則狀態低沉，苦苦掙扎，亞洲天王地位，大有更易之勢，熱刺上周中歐聯被AC米蘭淘汰，老孫亦毫無作為。
回歸英超，熱刺唯一目標只剩爭入前四，今場主場對森林，出齊老孫、哈利卡尼、李察利臣做正選，三叉戟前鋒陣全力搏殺。
歐聯賽後，李察利臣呻自加盟後不受重視，擺明怨干地，領隊亦予以還擊，話巴西前鋒渡過差勁球季，一個入波都未有。李察利臣今仗3分鐘即有波入，即時擺出「聽噓聲」同「收聲」手勢，還擊諷刺佢嘅球迷，點知睇VAR後證實佢越位在先，詐胡一舖，認真瘀皮。
都係大佬最可靠，哈利卡尼入兩球後，最佳拍檔孫興民62分鐘射成3比0。佢接應李察利臣傳中，一控一擺一射，乾淨俐落，有番亞洲天王本色。但孫仔今季太唔穩定，嚟緊周六作客修咸頓，踢成點又係一個疑問，希望佢繼續有料到啦！
講穩定，不得不提三笘薰，世界盃後場場交足貨，淡定自若、突露殺機，真心型爆。白禮頓作客兩度領先，都關三球王事，33分鐘佢唔係用腳，係用頭槌準確回傳中路，畀阿歷斯麥阿里士打近門射入。
招牌貨61分鐘出現，三笘薰左路控球，順勢擺脫對手傳中，落點夠晒毒，迫到列斯聯中場積夏里遜擺烏龍。雖然最終未能攞晒3分，但三球王無疑係白禮頓今仗最佳球員。
