周六凌晨英超，謝拉特再現久違激情，賽後高聲怒吼，因為阿士東維拉主場1:0險勝修咸頓，終於得到今季第2場勝仗，領隊職位仲保得住。
未對修咸頓前，維拉1勝2和4負，成績欠佳，謝拉特亦成為英超下一個被炒領隊次熱，大熱門係榜尾李斯特城主帥羅渣士。如果主場對聖人都全失3分，神奇隊長帥位大有機會不保。
除成績欠佳，維拉球迷亦因為兩個舉動，對謝拉特深感不滿，加劇佢被炒危機。第一，謝拉特堅持己見，始終重用跌watt古天奴，唔出貝安迪亞；第二，雪藏深受擁躉愛戴嘅中堅泰朗明斯，仲剝奪其隊長資格，直至新加盟中堅迪亞高卡路士養傷，先被迫再用泰朗明斯。
今仗古天奴依然做正選，表現的確去唔番上季中加盟後咁好，維拉攻勢主要來自里安拜尼，呢位前利華古遜翼鋒上季受傷患困擾，出場機會唔多，但今季發揮出色，今仗亦對修咸頓防線構成大威脅。
維拉上半場展示強勁爭勝決心，佔據主動，戰至41分鐘，藉角球造成門前混戰，有越位嫌疑嘅積及藍斯射成1:0。下半場雙方混戰居多，修咸頓反擊欠威力，維拉完場贏1:0，謝拉特得到今季第2場勝仗，壓力稍為減輕。
同日另一仗，森林主場又輸，上半場領先1球，但下半場竟然6分鐘內連失3粒，最終2:3不敵富咸。森林季前瘋狂入貨，共有22位新加盟球員，但季初成績差劣，1勝1和5負，排倒數第2。今仗未舉行前，森林主帥史提芬谷巴係被炒第3熱門，輸埋畀富咸後，被炒危機加劇，隨時快過羅渣士落鑊。
今輪英超有3場改期，包括車路士對利物浦、白禮頓對水晶宮、曼聯對列斯聯。
