【英超】主場15連勝創紀錄 維拉贏完曼城再挫阿仙奴 晉升三甲有力爭標?

阿士東維拉主場堅惡,尋晚英超尾場以1:0殺敗阿仙奴,維拉公園球場連續第15場勝仗,創下隊史主場連勝紀錄。

雖然贏波係有啲啲爭戲同運氣成份,但以維拉人腳,不得不佩服領隊艾美利嘅功力。自2022年10月上任以來,維拉踢咗21次英超主場比賽,得到17場勝利,勝出率81%,勝出場數係同期英超球隊中最多。

維拉繼上仗擊敗曼城後,再贏強敵阿仙奴,係英超史上第4隊可以連續兩仗擊敗上季冠、亞軍。賽後維拉已升至第3位,榜首利物浦37分,阿仙奴36分,維拉35分,曼城少踢1場(今晚對盧頓),30分排第4。

阿士東維拉保持上仗擊敗曼城嘅正選11人,以奧利屈堅斯掛帥。開賽後全程壓迫,喺7分鐘打破缺口,利安拜尼右路擺脫三名守將後傳中,麥甘尼控定轉身射入遠柱,維拉領先1:0。

阿仙奴如夢初醒,之後瘋狂進襲,薩卡、奧迪加特、加比爾捷西斯先後危險攻門,但唔係被安馬天尼斯撲走,就係被對方守將護空門。去到90分鐘,爭議性一幕出現,加殊疑似手球,之後夏維斯近門撞入,但同時被VAR判定夏維斯亦有手球,入球被推翻,維拉力保勝局。

今仗停賽嘅阿仙奴領隊阿迪達,賽後對球隊把握力不滿:「我哋嘅表現真係好好,根本就唔應該輸,不過這就是足球,你必須具有將個波送入網嘅能力,呢個係我哋今日唯一缺欠嘅嘢。」

阿迪達同時再次批評球證判決,不過都好大方盛讚維拉,「維拉完全配得上依家第3嘅位置,佢哋喺主場決心要贏得最多比賽,而佢哋亦有能力做到。」