仲唔炒真係冇天理……車路士周六英超主場出戰，竟然0比1不敵只有看守領隊嘅包尾大幡修咸頓，而且表現混亂，睇嚟唔換走樸達，買幾多人都嘥氣。
經過冬季轉會窗瘋狂買人，豪花2.95億英鎊，車路士近7仗只贏過1場，雖然領隊樸達不斷話球隊演出有進步，但今仗主場對弱旅，連隊形都未搞掂，攻守都散修修，完全浪費豪華陣容。
樸達年薪1200萬鎊（約港幣1.1億），合約至2027年，但佢教巨型班唔止冇經驗，去到現階段，亦睇唔到佢可以好順暢咁運用一班球星，車路士班主保利，點解對佢咁有耐性？
修咸頓近6戰輸5場，護級危機深重，及時解僱僅執教94日嘅尼芬鍾斯，仍未搵到新帥，對車路士時由施利斯（Ruben Selles）暫時領軍。施利斯喺哈辛赫圖年代已經擔任副手，也曾經喺後者被炒後出任看守領隊，深受球員愛戴，今次再次頂檔首仗即全取3分，仲要作客贏車路士，實在難得。
經過周中歐聯對多蒙特，車路士作出幾個位置變動，近期長任正選嘅夏維斯，今仗先任後備，讓位畀新星大衛科芬拿；另外列斯占士又傷，隊長艾斯派古達踢番閘位，古古列拿後備都冇。上半場車仔整體亦得個亂字，冇乜威脅。
反而修咸頓換咗領隊，球員生猛無比，個個多跑一步，頻頻截斷對手攻勢，突擊亦夠晒快速，令冇咗堤亞高施華嘅車仔防線，更加騰騰震，終於喺補時1分鐘，畀禾特普斯罰球搞掂，1比0。
車路士下半場換入夏維斯、史達寧，攻勢大有改善，但黑氣纏身，難得夏維斯兩次邊路傳出靚波，史達寧兩次攻門，都畀修咸頓球員救空門。
比賽尾段，艾斯派古達攔截射門時，頭部慘被修咸頓馬拉企圖打倒掛時踢中，傷情嚴重，經長時間治療，先至抬離球場。補時長達12分鐘，車仔所謂攻勢，仍然雜亂無章，最終輸0比1。
經此羞家一役後，車路士下周又迎來另一硬仗，倫敦打吡作客熱刺，問題樸達到時仲係咪領隊？再輸又會點呢？
修咸頓繼1987/88球季後，再次單季雙殺車路士，雖然仍以18分包尾，但已大大拉近差距。球員出盡全力，明撐看守領隊施利斯，賽前記者會佢聲言想擔正，依家爆出超級大冷，睇嚟相當有機會。
