真係要叫聲福爺喇！依家有邊條防線頂得住佢？周日英超聯賽，曼聯主場3:0大勝李斯特城，拉舒福特又入兩球，帶領紅魔迎戰未來兩場重要盃賽。
周五凌晨歐霸盃附加賽次回合，曼聯會喺主場對巴塞隆拿，跟住周日晚溫布萊球場決戰紐卡素，爭奪英格蘭聯賽盃冠軍。以福爺今季各項賽事已射入24球、打破個人一季最高入球紀錄、世界盃後17戰入16球等瘋狂數據，曼聯無疑有極強過關信心。
今場戰情，其實唔係紀錄睇咁懸殊，由於中場核心卡斯米路停賽，曼聯中後場控制同攔截力都受到影響，開波冇耐，防線已幾次畀李城劏開。
今場曼聯用連迪路夫同利辛度馬天尼斯鎮守中路，上半場畀李城製造咗兩個黃金機會；一個單刀、一次頭槌，睇怕曼聯必失，但都畀迪基亞救出。
曼聯上半場攻勢仲少過李城，但入到波至係王道，唔駛複雜嘅，佢兩個搞掂得喇！25分鐘，李城中堅菲斯隨意一腳交失，般奴費南迪斯中場附近截到，即時一腳直傳，又搵到拉舒福特，福爺無人看管，當然冇失拖，輕鬆射成1:0，連續7場英超主場有波入。
李城谷得太上，啱晒紅魔打反擊，上半場已嘗惡果，下半場追落後更侷住上，畀曼聯大量進攻空間，幾乎個個埋門都有入波機會，例如利辛度馬天尼斯曾頂中楣。卒之到56分鐘，福爺又有單刀機會，想佢唔入都好難，2:0。
查頓辛祖半場入替加拿祖，喺大局已定嘅情況下，62分鐘佢都入番球；之後曼聯仲有唔少機會，但未有再增添紀錄，贏3:0完場。
曼聯除英聯盃已入決賽，歐霸、英足盃仲有得爭外，其實英超冠軍都唔好當佢哋冇到。贏埋今場，24戰49分排第3，只比曼城（24戰）少3分，落後榜首阿仙奴（23戰）5分但踢多場，相距唔算太遠，若福爺繼續神勇，未必冇得追㗎！
