【英超】中門大開!曼聯作客吞水晶宮4蛋!創3個恥辱紀錄 坦克死撐:2024輸4場好少

周二凌晨英超獨腳戲,戰果出人意表,曼聯輸唔出奇,但作客水晶宮被大炒4:0,就真係離譜。更好波係領隊坦哈格,喺賽後記者會又有金句,話曼聯2024年暫時只輸4場,已經好叻㗎喇!

又創多項紀錄,不過係衰嘅。曼聯史上首次喺聯賽畀水晶宮雙殺;今季英超第13場敗仗,亦創隊史於英超一季輸波最多場數;各項賽事失81球,係自1976至1977球季後最多。

曼聯創下多項恥辱紀錄。

由於曼聯後防傷兵問題嚴重,今場侷住由莊尼伊雲斯、卡斯米路拍檔任中堅。曼聯真正中門大開,12分鐘,水晶宮米高奧利斯中路推20碼仍未受壓,直接入埋禁區起腳開紀錄。40分鐘,桑馬迪達大步推入禁區窄角度射成2:0完半場。

58分鐘,泰歷米素爾門前射成3:0。66分鐘,卡斯米路後場被丹尼爾蒙路斯搶走控球權,後者再傳畀禁區頂嘅奧利斯勁射入網,水晶宮大勝4:0完場。

坦哈格喺賽後記者會,永遠都咁搶戲,佢首先承認表現唔掂:「好明顯,我哋嘅表現係水準以下。」不過之後,佢又點都要𢲡番咋沙:「整個球季,我哋有好多問題。但今場只係2024年第4場敗仗,真係唔算多。我會繼續戰鬥,盡我所能去幫球隊,為下場做好準備,我會搵返能量。」咁都可以咁正能量,係坦克先做得到。