【英超】中楣又中柱 森美卡斯傷埋;黑仔利物浦和1:1 阿仙奴做聖誕冠軍冇著數?

利物浦下半場後段,3分鐘內中柱又中楣,周日凌晨英超只能1:1逼和阿仙奴。未能全取3分之餘,更增加森美卡斯、戴亞斯兩名傷兵,前者更肯定有排抖,令紅軍雪上加霜。

上半場同薩卡一次劇烈碰撞,令森美卡斯倒地,仲撞跌埋高普。森美卡斯即時離場治理,更要送院檢查,發現鎖骨骨折,肯定要養傷一段時間。由於另一左後衛羅拔臣未能復出,未來賽事只能用通天老倌祖高美斯頂替。至於戴亞斯亦喺下半場傷出,情況有待進一步檢查。

森美卡斯同高普炒埋一碟

利物浦真正傷兵滿營,森美卡斯重傷後,傷兵名單有迪亞高祖達、阿歷斯麥阿里士打、羅拔臣、祖爾麥迪比、艾簡達拿。睇嚟1月真係有需要增援班救兵。

和波後,阿仙奴18戰40分,聖誕節前以1分之微領先利物浦及阿士東維拉,佢哋之前試過3次做聖誕冠軍,最終兩次得亞軍,1次季軍,今季又會點情況?

雖然作客,但阿仙奴今仗開波僅4分鐘,已由中堅加比爾接應罰球頂成1:0。紅軍之後積極反撲,雖然奧迪加特一次禁區內疑似手部掂波冇判12碼,但戰至29分鐘,仍由阿諾特交出精準60碼長傳,沙拿擺脫辛真高後勁射追成成1:1。

41分鐘,兵工廠快速反擊,薩卡單刀埋門,艾利臣比加出迎封阻,個波輾轉落喺馬天尼利腳下,呢位巴西國腳面對冇門將把關嘅龍門,竟然射唔中目標,浪費黃金機會,兩軍半場不分勝負。

換邊後,利物浦連環攻門,71分鐘,剛入替嘅哈維艾利洛起腳,省中加比爾再中柱彈出,2分鐘後,沙拿快攻突圍後傳右路,阿諾特趕到射門又中楣,利物浦最終只能以1:1賽和阿仙奴。

高普賽後除咗激讚阿仙奴,亦對一眾子弟兵讚賞有加:「天呀!阿仙奴點解可以勁成咁?好消息係我哋都好好。喺呢啲咁高水平嘅比賽,晨咁早失守係好難踢,尤其阿仙奴速度咁高!」

惺惺相惜

熱刺憑李察利臣、孫興民各建一功,主場2:1挫愛華頓,回勇三連勝之外,亦以36分回升第4位。