「蜘蛛仔」祖利安艾華利斯建功，曼城周六英超尾場，主場以1:0小勝紐卡素；但最搶鏡其實係菲爾科頓，喺沒有奇雲迪布尼的日子，呢位英格蘭攻擊中場，作用更加重要。
曼城主場連勝已增至17場，聯賽主場對紐卡素亦15連勝，今場中東石油打吡，雙方未有如賽前預料，踢出高水準好波，反而踢得相當拘謹，以不先失波為目標，特別係紐卡素，唔敢主動搶攻，全場欠缺有威脅埋門，輸得合理。
曼城今仗繼續用祖利安艾華利斯做正選，同基亞利利殊、祖爾科頓支援艾寧夏蘭特。冇咗根度簡插上、馬列斯右路過波，加上奇雲迪布受傷長抖，曼城攻勢係單調咗，但恃住平均質素高，依然取得大部份控球權。
科頓仔承包奇雲迪布尼工作，主力策劃攻勢，效果幾好。31分鐘，佢喺左路回傳畀祖利安艾華利斯，阿根廷國腳控定後射遠柱，樸比撲到照入，曼城終開紀錄。
10分鐘後，曼城再喺左路進攻，又係科頓，轉身傳予艾寧夏蘭特，殺神第一時間起腳僅僅斜出，藍月亮半場領先1:0。
曼城易邊後仍然佔優，64分鐘，艾寧夏蘭特接應科頓傳送，近射又斜出，呢對拍檔1分鐘後再度配合，今次艾寧夏蘭特射門被樸比用腳擋走，超級射手三度浪費科頓妙傳，但曼城已足夠擊敗紐記，開季兩連勝。
