【英超】上半場領先3球 最尾險勝3:2!阿仙奴繼續衝冠;熱刺兩場失7球 點追維拉?

周日英超重頭戲,阿仙奴捱過最嚴峻一關,倫敦打吡作客熱刺,上半場領先3球,雖然最終只險勝3:2,仍繼續佔據榜首,實行同曼城鍊到尾。

利物浦連環失分,冠軍巳成阿仙奴、曼城之爭。阿仙奴目前35戰80分居榜首,曼城將於稍後作客森林。如果大家贏晒餘下賽事,冠軍仍然係曼城。

熱刺亦要力爭前4,雙方各有所需。初段阿仙奴前場逼搶做得唔錯,夏維斯早段曾經入波,可惜助攻嘅馬田奧迪加特僅僅越位。15分鐘,阿仙奴又靠迫搶,令熱刺後場失去控球權再輸角球,防中賀積查治擺烏龍頂入自己龍門,阿仙奴領先1:0。

阿仙奴上半場係有啲運,熱刺擺完烏龍後全力反攻,先有中堅基斯甸羅美路離門兩碼頂中柱,再嚟另一中堅雲迪尹助攻射入,但睇咗好耐VAR之後,判越位詐胡。

熱刺喺27分鐘輸多球,佢哋攻入禁區失波後,畀阿仙奴嚟一個精彩反擊,只需兩三腳波,夏維斯靚傳,薩卡帶入禁區射成2:0。38分鐘輪到夏維斯自己入波,接應角球頂成3:0。上半場阿仙奴射門只有4次,但就入3球,效率超高。

下半場阿仙奴本來幾穩陣,但龍門拉耶64分鐘發波瘟,無厘頭交失波,畀基斯甸羅美路一聲唔該,射成1:3。87分鐘,迪勤懷斯禁區內想解圍,點知踢跌賓戴維斯被罰12碼,孫仔射成2:3,令賽事進入高潮。阿仙奴最後仍保住勝局,直衝今季最後3仗,力求贏晒之餘,再望曼城失分。

尋日維拉畀車路士迫和,但熱刺未能追近,仲要輸埋。目前第4位之爭,維拉35戰67分仍然佔先,熱刺33戰60分,繼上仗吞紐卡素4蛋後又失3球,以呢條防線嚟計,維拉只要冇乜大走樣,下季肯定可以進軍歐聯。