【英超】上半場浪費唔少機會 阿仙奴依然送般茅3蛋;唔理爭標結果 仍有望破隊史紀錄

無論最後可唔可以攞冠軍,阿仙奴周六英超主場3:0挫般尼茅夫,以26場勝仗,追平隊史英超單季贏波場數紀錄。

阿仙奴曾經喺2001-02賽季、2003-04賽季同2022-23賽季英超取得26場勝利。今季仲有兩場波,分別作客曼聯同煞科戰主場對愛華頓,應該可以破隊史紀錄。贏埋呢場,阿仙奴36戰83分,比少踢兩場嘅曼城多4分,藍月亮周日凌晨會主場對狼隊。

今場完全優勝劣敗,阿仙奴如果把握力好啲,上半場已經可以領先3至4球。睇吓數據,阿仙奴上半場射門16次,般茅只有1次。錯失咁多機會,只能藉夏維斯喺45分鐘搏得12碼,薩卡主射1:0完半場。

打完半場,阿仙奴著名擁躉皮亞斯摩根(Piers Morgan)亦喺社交平台話,隊波就係欠一個世界級前鋒,中場幾水銀瀉地都唔夠,佢好贊成向紐卡素收購中鋒阿歷山大伊沙克,會好啱兵工廠用。

般茅位列中游,以球員班底計,已經超級交足貨,佢哋下半場嘗試反攻,亦有些微威脅,但未能追平之餘,更被托沙喺70分鐘入多球,為阿仙奴穩住局面,之後般茅同阿仙奴各有一球被VAR判定無效,去到補時階段迪勤懷斯表演,入多球贏3:0完場。