【英超】三笘薰又入波 勢成史上No.1!白禮頓有超強數據支持 同大會爭歐洲賽資格

三笘薰又嚟料,貢獻入球助攻各一,白禮頓顯示強大統治力,主場4:0大炒韋斯咸,保持目前水準,甚至有力挑戰前4席位。

踏入2023年,白禮頓更見勇鋭,連今仗在內,打咗8場聯賽,成績係4勝2和2負,目前以23戰38分排第8位。由於比賽場數較少,佢哋目前失分比第4位熱刺更少,同第5位紐卡素相同,數字上確有機會爭前4席位。

同以上富豪球會相比,白禮頓只屬細路仔,財力差天共地,能得到目前成績,實在難能可貴。即如今場對韋斯咸,全場佔有70%控球率,射門次數14:2,佔據絕對優勢,好多大會都未必做得到。

白禮頓大勝,三球王當然有唔少貢獻,開波18分鐘,佢接應高波靚絕控低後即帶入禁區,動作一氣呵成,韋斯咸後衞情急將佢撞跌,判罰12碼,阿根廷國腳阿歷斯麥阿里士打主射破網。

白禮頓中前場發揮出色,攻勢快速流暢,51分鐘祖爾韋特文藉角球射成2:0後,一個前場美妙配合於69分鐘出現,柏斯高哥斯傳向遠柱,三笘薰門前剷入,日本天王取得今季第6個英超入球。

中鋒韋碧克完場前射成4:0,令白禮頓今季英超入球增至43個,只係低過曼城(66)、阿仙奴(59)、熱刺(46),比曼聯(41)、利物浦(40)更多。

三笘薰最近11場總共入6球、2次助攻,直接參與8個入波,只係23場比賽,就已經追平香川真司、岡崎慎司創造嘅日本球員喺英超單季進球紀錄,只要入多1粒,三球王就可以創造歷史。