【英超】一戰超越夏世三!帶領車仔4連勝 彭馬連環破紀錄;後勁超強殺入前6 歐霸在望

1場賽事,高爾彭馬刷新2個數據,超越夏薩特、追平林柏特,更令車路士4連勝,數字上有機會喺煞科日趕過熱刺,得到下季歐霸盃參賽席位。

周四凌晨英超,車路士作客2:0贏白禮頓,37戰60分升上第6,只落後第5位熱刺3分,但車仔得失球差贏緊3球。如果周日煞科,車仔主場贏般尼茅夫,而熱刺作客輸畀錫菲聯的話,車仔將會後上搶走第5,攞到下季歐霸盃入場券;熱刺若跌至第6,就會踢歐協聯。

當然,若果曼城喺足總盃擊敗曼聯封王,咁歐霸資格就係第5、第6位球隊參與,到時車仔、熱刺都有得玩,而第7就會踢歐協聯。

自4月24號吞阿仙奴5蛋之後,車仔爆發後勁,作客和維拉,連贏熱刺、韋斯咸、森林,今仗作客白禮頓,亦喺34分鐘先開紀錄,高爾彭馬今季經常入靚波,不過呢個靚入波唔係用腳,罕有咁來自頭槌。

計埋呢球,今季由曼城轉投車仔嘅彭馬,已經入咗22個聯賽入球、另有10次助攻,呢位英格蘭中場今個賽季直接參與英超入球達32次,創造車路士隊史單季紀錄。之前紀錄保持者係夏薩特,佢喺2018/19貢獻16入球15助攻,總共31球。

22個入球,亦令今季英超出場32次嘅高爾彭馬,追平另一位傳奇藍戰士紀錄。林柏特2009-10賽季,代表車仔出場36次入22球,係呢位一代中場單季最高入球數。依家高爾彭馬仲有1場喺手,有機會破埋林伯紀錄,進一步確立車仔新王地位。

前鋒尼干古後備入替,64分鐘射成2:0,雖然列斯占士88分鐘領紅,補時8分鐘畀韋碧克追番球,仍然無阻車仔贏2:1。

另邊廂,曼聯主場3:2挫紐卡素,兩隊同得57分,紐卡素藉較佳得失球差排第7。曼聯今仗贏波功臣係攻擊中場迪亞路。呢位科特迪瓦國腳,2020年東窗由阿特蘭大轉投曼聯,之後借過畀格拉斯哥流浪、新特蘭,一直備受冷落,今仗罕有做正選,果然爭氣成為全場最佳。

迪亞路31分鐘助攻,明奈為曼聯先開紀錄。雖然哥頓完半場前追和,迪亞路57分鐘射成2:1,曼聯再領先。海倫84分鐘擴大優勢,即使補時畀賀爾入番球,曼聯最終仍贏3:2。