曾幾何時，佢係英格蘭金童，國家隊必然正選，熱刺歐聯亞軍成員，前途一片光明。迪利亞里，26歲，一個壞咗嘅球員，依家連愛華頓都怕咗佢，好大機會轉戰土耳其聯賽。
2018世界盃，有人話英格蘭領隊修夫基填正選球員名單時，第一個係哈利卡尼，第二個就到迪利亞里。可想而知，當時佢幾被睇好，喺熱刺同哈利隊長、孫興民鼎足而三。
點解兩、三年間會突然沉淪？咪少年得志，爛滾爛玩囉！廿零歲仔，突然錢多到駛唔晒，對踢波失去熱情，唔見咗初心，結果越踢越沉。
唔係冇人提佢，摩連奴2020年教熱刺嗰陣，曾經想扶番正亞里，佢對迪利亞里講：「我都曾經24歲，但轉眼就57歲。踢波時間只會好短暫，每個人都要好好掌握。」
呢條紀錄片片段，見到迪利亞里表情其實好唔耐煩，可能覺得個老鬼點解會咁煩，到干地上場，點會容得下懶散球員，上季季中，熱刺但求甩手，同愛華頓達成協議，迪利亞里要達到固定出場次數，先至收轉會費，個刁對愛華頓都幾著數。
結果係點？迪利亞里只出場13次，而且冇腳好波，愛華頓想藉佢增強攻力，但一個入波都冇參與過。
除咗表現差之外，佢嘅態度亦令跟過摩佬嘅林伯反感，特別係亞里經常坐住萊斯萊斯出席練波，真係萬衆矚目，睇到會方眼都突埋。既然仲未夠出場次數，仲未駛科水畀熱刺，決定趁今個夏季轉會窗，送走呢個壞咗嘅球員。
有冇英超球會有興趣？現階段係冇嘅。迪利亞里嚟緊應該會告別英超，最大機會加盟土耳其球會比錫達斯。以佢嘅天份，26歲仔就去土超，可惜咗啲。
