曼城今季氣勢如虹，英超冠軍已經落袋，足總盃、歐聯又殺入決賽，而且贏面被一致睇好，大有機會比肩99年曼聯三冠王朝。
之前傳過，主帥哥迪奧拿幫曼城拎到夢寐以求嘅歐聯之後，就可能會Hea多一年，然後再搵下一個挑戰。
日前哥帥接受《天空體育》專訪，就被問到相關問題：「如果拎到三冠王之後，下個挑戰目標係乜？」點知哥帥神回：「作客熱刺拎到入球！」幽默嘅答案令現場眾人都笑到Gap Gap聲。
事實上，唔講大家都未必記得，原來曼城對上4個賽季作客熱刺，係錄得全敗兼食白果嘅劣績：
2022-23 熱刺 1:0 曼城
2021-22 熱刺 1:0 曼城
2020-21 熱刺 2:0 曼城
2019-20 熱刺 2:0 曼城
幽默而有料，一向都係哥迪奧拿嘅標誌嚟。今季英超最佳領隊競爭激烈，即使哥帥拎到三冠都未必穩勝，因為阿迪達、艾迪賀維，甚至係迪薩比、艾美利以至坦哈格，都係有力嘅挑戰者。
《每日郵報》就呢個獎搞咗個民調，哥帥以37%選票暫時領先，阿迪達、賀維同得16%並列第二，迪薩比13％第三。
