【英聯盃】米堡越級挑戰 4強首回合先下一城; 彭馬「世紀miss」車仔整定輸波

連今季表現最好嘅高爾彭馬都頻頻失機,有個仲係世紀miss,難怪車路士周三凌晨英格蘭聯賽盃4強首回合,作客0:1輸畀英冠米杜士堡喇!

米杜士堡越級挑戰,先下一城,奠勝球喺上半場37分鐘出現,當時艾西亞鍾斯右路突破後底線傳中,希頓赫尼小禁區快腳一篤搞掂。次回合將於兩周後上演,輪到車仔主場。

米堡小勝一粒。
卡域克有料到。

車仔今仗由老將泰亞高施華鎮守防線,呢位巴西名將以39歲109天,成為自10年前曼聯傑斯(40歲39天)後,英聯盃4強賽歷年最年長球員。但車仔全場雖然控球指數超過7成,埋門次數亦比主隊多,只係高爾彭馬連番失機,成為輸波關鍵。

世紀miss

32分鐘禁區邊射斜,係彭馬作為罪人嘅起點,佢喺上半場補時階段離門約5碼補射高出,更被形容為世紀miss。車仔下半場中段換入梅迪歷及波也,依然係攻勢多而破關乏力,次回合需要平反敗局,先有機會同利物浦或富咸爭霸。

車路士敗陣,接連失機嘅高爾彭馬難免成為罪人,領隊普捷天奴冇正面怪責,但承認真係錯失良機。

「彭馬係浪費咗最佳入球機會,但呢種事總會發生,我哋把握力唔夠,上半季車路士製造咗好多機會,冇贏波就係因為把握唔夠好。」

雖然今仗做咗罪人,彭馬本季依然係車路士最佳球員,呢點絕無疑問。佢喺各項賽事已入8球,為全隊之冠,貢獻7次助攻亦係最多,難怪普捷天奴完全冇怪罪佢啦。