連皇入波，連佢都有士哥！熱刺喺周四凌晨英格蘭聯賽盃第3圈，出埋哈利卡尼都冇用，作客0:2負諾定咸森林，同倫敦宿敵阿仙奴、車路士一齊被擯出局。
為咗世界盃，季初比賽已經密到爆，特別係要應付歐洲賽嘅球隊，每個禮拜至少一周雙賽，到今個星期，又塞場英聯盃，真係攞人命。好似熱刺咁，傷兵多兼板櫈深度唔夠，主帥干地又想搏吓盃仔，搞到哈利卡尼等一班主力又要搏殺，睇番今季21場波(超痴線，開咧3個月已踢咗21場…)，卡尼場場都係正選，真係戥佢辛苦。
森林對住攰到爆嘅熱剌，爭取到唔少攻勢，雷蘭洛迪50分鐘先開紀錄。連格今季轉會後備受劣評，聯賽正選亦不保，但今仗有翻生之勢，表現好活躍，57分更頭槌破網，取得加盟森林後首個入球。
李察利臣養傷一排，下半場亦後備上場，曾經頭槌破網，但越位在先。即使森林末段有球員被逐，熱刺亦未有作為，提早解脫出局。
阿仙奴上周喺英超擊敗車路士，仍居榜首，加上歐霸已入16強，以佢哋兵源，應付呢兩條戰線已經掹水，主場對白禮頓，只得威廉沙列巴係主力，其餘出晒後備，係比賽末段先換入部份主力，最終輸1:3，同樣提早甩身。
上屆冠軍利物浦，傷兵問題更嚴重，主場對英甲打比郡，高普去到好盡，用祖高美斯、森美卡斯、張伯倫、卡華路，帶住成班仔上陣。後生仔夠快又肯搏，一直壓住對手砌，但未能製造入球，高普下半場換入法明奴、達雲紐尼斯，希望打破僵局，但始終冇波入，雙方0:0打和，利物浦要靠互射12碼，先以3:2淘汰打比郡。
曼城主場對車路士，雙方都收起部份主將，艾寧夏蘭特、迪布尼、夏維斯、史達寧等全部先列後備。但計兵源，又有邊隊可以同曼城比吖，馬列斯、祖利安艾華利斯入波，輕鬆贏2:0晉級。
車路士近5場本土賽事未贏過，而且3連敗，今個周六深夜又要作客對弗爆嘅紐卡素，相當難頂。
