【英聯盃】梅迪歷補時扳平 車仔12碼射贏紐卡素入4強;捷比亞孭鑊 賀維:好大打擊

雖然聯賽成績差,但車路士晉級英格蘭聯賽盃4強,可以喺呢個嚴寒天氣,為領隊普捷天奴止一止咳。

今晨8強戰,車路士同紐卡素兩間富豪球會,聯賽冠軍無望,所以盃仔都好重視,盡遣強陣出擊。車路士晉級過程既驚險又富戲劇性,佢哋上半場16分鐘已失守,紐卡素威爾遜未到中圈前開始推進,面對車仔三名球員追纏,仍突破射入。

威爾遜單騎建功。

眼見晉級在望,戰至補時兩分鐘,紐卡素捷比亞頭槌解圍唔夠力,畀梅迪歷冷手執個熱煎堆衝前抽入,為車仔扳平。烏克蘭鋒將梅迪歷上季中以1億鎊身價加盟車路士,被譏笑為「天價廢柴」,今次取得重要入球,會唔會係轉變嘅開始?

雙方打和,即時互射12碼,捷比亞再做罪人,主射12碼斜出,隊友列治操刀亦被佐治柏度域擋出,最終車路士以4:2獲勝。

捷比亞一向係穩健先生,但近期大跌watt,對愛華頓、熱刺都要負輸波責任,到英聯盃再孭鑊,亦反映之前要兼顧歐聯嘅紐卡素,整體球員已攰到極點。

賽後領隊賀維冇提呢位後防大將,只係抒發輸波心情:「講真,打擊真係好大,感覺就好似歐聯對巴黎聖日耳門賽後一樣。我哋已經盡全力,領先咗一段長時間……其實失波係集體責任,而唔係個人問題。」

同日另一場英超內鬥,愛華頓主場對富咸亦打和1:1,最終富咸互射12碼贏7:6晉級。英冠米杜士堡作客以3:0大勝甲組仔維爾港晉級。另一場4強,利物浦對韋斯咸會喺今晚深夜4點舉行。