相隔4日，曼聯復仇成功！英格蘭聯賽盃第3圈，紅魔克服兩度落後劣勢，主場4:2反勝阿士東維拉，晉級後下一圈對手只係英冠般尼，極有機會再過一關！
曼聯坦哈格似乎頗為重視英聯盃，今場用咗好多主力，C朗打咗幾場正選，包括上仗對維拉，嚟到盃仔畀佢休息，由安東尼馬迪爾拍拉舒福特打雙箭頭；般奴費南迪斯坐鎮中場，麥佳亞正選拍連達路夫，杜巴夫卡打龍門。
講到盃賽，維拉新領隊艾美利當然係專家，4奪歐霸盃前無古人，上仗初上任，維拉即以3:1挫曼聯，相隔4日又碰頭，可惜今次新帥效應失靈，面對打番快速攻勢嘅曼聯，盃王都冇符。
由於作客，維拉相對謹慎，上半場畀曼聯有較多進攻機會，但維拉防線相當緊密，紀律性較之前大為提高，令紅魔徒有攻勢，冇真正威脅。
下半場開波，維拉踢法轉為積極，48分鐘積及藍斯靚助攻，奧尼屈堅斯射成1:0。落後僅1分鐘，般奴費南迪斯乘維拉防線推得太上，右路突破傳中，安東尼馬迪爾近門輕鬆射入扳平。
61分鐘達洛治擺烏龍，維拉再度領先，呢場波夠晒精彩，曼聯亦玩大佢，換入艾歷臣、艾蘭加、加拿祖，展開全面攻擊，5分鐘後，拉舒福特就個人表演，擺脫對手3個後衞，為曼聯追和2:2。曼聯氣勢正盛，特別係阿根廷小將加拿祖，喺左路頻頻快速突破，令維拉防線陷入崩潰。
不斷狂攻之下，般奴費南迪斯78分鐘射成3:2，曼聯後來居上；補時階段，加拿祖傳中，麥湯米尼殺入禁區，射成4:2完場，晉級第4圈。
曼聯晉級後，賽會亦隨即為第四圈抽籤，曼聯下圈嘅對手只係英冠嘅般尼，而最矚目嘅，就梗係曼城主場鬥利物浦啦！另外新Big 7紐卡素，就會同般尼茅夫鬥法。至於第四圈嘅比賽日期，係世界盃決賽後2至3日，癲到……
