好耐冇見，夏蘭特依然咁堅！經過1個月嘅世界盃洗版，冇份參與呢個4年一度盛事嘅球星，就好似銷聲匿跡一樣，不過世盃完結後4日，英格蘭聯賽盃就即刻上演曼城對利物浦，挪威球星夏蘭特、埃及王牌沙拿，就各用一個入波話畀大家知：「我仲喺度」！
尋晚16強賽事，叉足成個月電嘅艾寧夏蘭特同沙拿大鬥法，結果夏蘭特轟入一球靚波，助曼城主場以3比2擊敗利物浦，晉身8強。
曼城喺今屆世界盃，一共有16人入選所屬國家隊，當中11人踢到入8強階段，但唔少國腳已經極速歸隊，而曼城今場亦強陣出擊，奇雲迪布尼、洛迪、根度簡組成中場，前面有馬列斯、夏蘭特同龐馬，史東斯、科頓、基亞利殊同貝拿度施華呢啲8強國腳，稍後時間亦有落場搏殺。
利物浦亦有6位球員踢到入世界盃8強階段，大部份亦已歸隊，不過紅軍今場陣容相對較削，但前面都總算有沙拿、紐尼斯，中場哈維艾利洛同堤亞高艾簡達拿孭飛。
雙方今仗鬥攻，10分鐘，奇雲迪布尼傳中，夏蘭特凌空射入靚波開紀錄，10分鐘後，利物浦由法比奧卡華路扳平1比1。呢場波堅好睇，入波梅花間竹，下半場2分鐘，曼城馬列斯冷靜控定建功，2比1。唔夠1分鐘，利物浦紐尼斯助攻，沙拿扳平2比2。
58分鐘，世界盃黯然失色嘅奇雲迪布尼貢獻助攻，阿基頂入，曼城最終贏3比2，殺入8強，對手係另一支英超球隊修咸頓。
夏蘭特時隔個零月後，又再做主角，今季為曼城上陣19場入24球，而歷史上，雲尼斯達萊、沙拿係單季最多入波嘅英超球員（44球）。
至於曾經被拎嚟同夏蘭特比較、同樣係今季登陸英超嘅達雲紐尼斯，今場4次射門，但全部唔中目標，包括下半場單刀射斜，至今為利物浦上陣19場入9球，同夏蘭特根本係兩個層次。
英聯盃8強對賽形勢
曼聯 Vs 查爾頓
修咸頓 Vs 曼城
諾定咸森林 Vs 狼隊
紐卡素 Vs 李斯特城
