英格蘭聯賽盃4強誕生，修咸頓主場爆冷2:0挫曼城，諾定咸森林主場1:1和狼隊，最後藉互射12碼贏4:3晉級。
本月底即踢4強戰，經抽籤後，曼聯會對森林，紐卡素對修咸頓。曼聯、紐卡素冇抽中對戰，有機會決賽先合演本屆嘅「夢幻決賽」。
近年英聯盃冠軍常客曼城，踢出今季目前水準最低劣一仗，面對英超榜尾修咸頓，全場7次射門0中目標。
為留力周六英超對曼聯，曼城收起迪布尼、夏蘭特等主力無可厚非，但其他球員發揮欠佳亦係事實，阿根廷中鋒祖利安艾華利斯難得做正選，卻錯過兩個入波良機。
修咸頓全場控球率不足30%，但喺23及28分鐘，由瑪拉、迪贊尼普入波，成功爆冷。聖人走勢好奇特，聯賽6連敗淪為包尾，但盃賽反而好堅挺，除今仗外，上周末足總盃作客以2:1淘汰水晶宮。
另邊廂，森林與狼隊法定時間踢成1:1，最終於互射12碼擊敗狼隊，門將甸恩軒達臣成為英雄，先後撲出魯賓尼維斯、鶴治射門，帶領球隊自1992年後再入英聯盃4強。
但4強抽中對曼聯，甸恩軒達臣因為由紅魔借出，根據條例，外借球員禁止倒戈，除非曼聯書面提出，准許佢為森林上陣，否則甸恩軒達臣將無緣4強戰。
