周三凌晨英格蘭聯賽盃8強，曼聯主場3:0淘汰英甲查爾頓，聯賽加盃賽，連勝走勢增至8場，拉舒福特後備登場又入兩粒，已連續6場有波入，坦哈格亦成為曼聯史上最快20勝嘅主帥。
周四凌晨，仲有曼城對修咸頓、狼隊對諾定咸森林。如果以睇波角度，今屆決賽最吸引戲碼，或者係曼聯對紐卡素，起碼夠晒新鮮感，唔駛成日都係曼城。
由今仗起，12日內要進行4場比賽，對完查爾頓，曼聯嚟緊周六對曼城，下周四凌晨對水晶宮，跟住周一凌晨（23號）鬥阿仙奴，賽程密到爆，英聯盃當然要大輪換。
同上仗贏愛華頓相比，曼聯作出9個變動，拉舒福特、卡斯米路、艾歷臣、般奴費南迪斯、勞基梳爾、華拉尼等先列後備，中場仲出埋17歲小將馬恩奧。
板櫈深度夠，而且對手弱，曼聯可謂綽綽有餘，上半場控球權超過70%，有10次射門，阿根廷新星加拿祖左路表現搶晒鏡，唯一入球來自右翼安東尼，呢位巴西國腳21分鐘駛出招牌絕技，右路推中，起左腳射遠柱掛網而入，靚波！
曼聯下半場派番卡斯米路、艾歷臣、拉舒福特上陣，福仔完場前梅開二度，連續6場有入波，豪取7個士哥，腳風順到冇朋友。
曼聯喺坦哈格麾下越戰越勇，由上年11月開始，連埋今場已經8連勝，係曼聯近4年來最佳成績，而坦哈格只係用咗27場波，就已斬獲20勝，刷新曼聯領隊紀錄，強勢迎接嚟緊周末嘅曼市打吡。
另邊廂，紐卡素上周末足總盃衰輕敵，竟被英甲錫周三淘汰，痛失爭盃機會，嚟到英聯盃交番應有水準，丹般恩、祖連頓下半場先後建功。李斯特城有追近機會，但占美華迪後備上陣，錯失兩個黃金餐士，最終吞兩蛋而回。
