前利物浦門將卡利奧斯，忽然成為世界球壇焦點。兩年冇正式比賽，周日將為紐卡素上陣，於聯賽盃决賽對曼聯。再做小丑？抑或完成偉大自我救贖？只有一線之隔。
2018年5月26日歐聯決賽，利物浦於基輔與皇馬進行王者爭霸。卡利奧斯兩個極低級錯誤，令紅軍屈居亞軍，呢位德國門將受千夫所指，被利物浦擁躉辱駡、被其他球迷譏為球壇小丑。
勝負決定一切，兩個蝦碌輸波鏡頭，深入民心，載入史冊。但有邊個記得，卡利奧斯未出錯前，曾經發生一件事，若換轉今日出現，卡利奧斯好大可能無需背負污名……
回帶至當日，下半場3分鐘，卡利奧斯畀皇馬中堅沙治奧拉莫斯用踭打中頭部，卡利奧斯即時瞓低，向球證投訴，可惜不受理會，利物浦軍醫亦未有入場檢查傷勢。
比賽繼續，132秒後，卡斯奧斯即犯嚴重錯誤，掟波誤交賓施馬，被射成0比1，到83分鐘更出現著名「牛油手」，未能接住加里夫巴利遠射，畀個波從雙手流入龍門。
醫生Ross Zafonte 賽後證實，卡利奧斯受批踭影響，出現腦震盪，會影響判斷，但令人留下深刻印象嘅，只會係兩個出醜鏡頭。
換轉今日球例，如球員頭部受傷，球證亦必需立即吹停賽事，畀隊醫入場檢查，時間可長達3分鐘，決定傷者可唔可以繼續比賽。球例由2021年起推行，以卡利奧斯當時嘅情況，極有可能已被換走。
歐聯決賽後，卡利奧斯未有再為利物浦上陣，之後曾外借比錫達斯及柏林聯，間中仍有低級犯錯，噩夢未散；到去年9月，終於以自由身加盟紐卡素，擔任第4號門將，初時只簽4個月。
紐卡素大把錢，短約到期後，領隊賀維唔駛再慳家，同卡利奧斯續約至今季完結。當時冇人會估到，呢個可能成為賀維嘅領隊生涯入面，其中一個重要嘅續約決定。
紐卡素要破56年冠軍荒，但正選門將普比對利物浦被逐出場，英聯盃決賽要坐波監；第2及3號門將，又因不同理由未能上陣，天意註定，卡利奧斯要再接受命運審判。
命運由我不由天。有唔少花生友，想睇佢哋心目中嘅小丑再度出醜，此時此刻，只有隊友最可靠。賀維及中鋒哥林威爾遜都作出鼓勵，希望卡利奧斯親手改寫足球生命，完成自我救贖之旅。
「足球係最好朋友」，希望卡利奧斯開心番啲喇，唔好再對呢個圓形物體有陰影，星期日打出水準，對得住呢場決賽，冇辜負呢項運動。
