仲回味緊世界盃？都好正常嘅，不過英格蘭聯賽盃16強已經開打番喇，周三凌晨紐卡素已經出場，主場出強陣，以1:0小勝般尼茅夫晉級。
為咗爭入8強，紐卡素盃仔照用強陣，有份參與決賽周嘅哥林威爾遜、般奴古馬雷斯都做正選。雖然攻到對手氣咳，全場17次射門，但只憑對手67分鐘擺烏龍，先至贏到波，唔少球員抖咗成個月，未即時撻番着。
冬季轉會窗下月重開，唔少人關心紐卡素會唔會增兵，挑戰英超冠軍。雖然有沙特阿拉伯財團揼水，但佢哋買人以實用為主，唔係名氣掛帥。世界盃後有好多球員名氣大震，水漲船高，但紐卡素增兵政策未有改變。
其中一個超新星，係阿根廷21歲年輕球員安素費南迪斯，「新華朗」目前効力賓菲加，決賽周輔助美斯，表現出眾，更當選最佳新人。普遍預料冬季轉會窗期間，會成為各大豪門爭取收購對象。
安素效力賓菲加，前紐卡素名將舒利亞，對呢位新星極度欣賞，向前東家領隊艾迪侯域大力推介，仲話只要引入呢名天份極高嘅中場球員，將大大幫助紐卡素達成英超霸業。
但侯域表示冇乜興趣，認為唔可以單睇世界盃表現，就作出收購行動：「對唔住舒利亞，我對你嘅推薦興趣唔大。從引援角度睇，你永遠唔會只分析世界盃，單獨以呢個表現作為原因去簽一名球員，簽入球員需要做大量工作，絕對唔會只花4個星期嘅時間。」
安素費南迪斯係現時最Hit爆新星，賓菲加為佢標價1億鎊，侯域直言價格太貴，而且十分唔穩定。
侯域依家當然夠晒牙力，佢嘅球隊目前排第3，只落後第2位曼城2分，今季只輸過1場，同榜首阿仙奴都係輸波最少嘅球隊，聯賽重開首仗，下周一晩拆禮物日對李斯特城。
