【英聯盃】兩回合3:2挫富咸;利物浦殺入決賽鬥車仔 高普High爆:WOW、正呀!

夢幻決賽誕生!英格蘭聯賽盃4強次回合,利物浦與富咸各一言和,兩回合計紅軍贏3:2,2月25號將會與車路士爭霸,合演兩年前翻版決賽。

兩年前,車仔同利物浦踢咗場緊張但冇波入嘅比賽,最終紅軍憑互射12碼獲勝,封王聯賽盃。當時嘅車仔如今已面目全非,而利物浦變動亦大,不過點變都好,領軍嘅依然係激情高普。

「老實講,今晚唔算亮麗,不過我哋嘅任務係晉身決賽,而球員做到了,好出色。」賽後記招提到決賽鬥車仔,高普就即時High爆:「WOW!真係超正,我哋兩隊波踢決賽已經有晒經驗,知道大家嘅期待,對車路士一定係緊張刺激嘅賽事。」

利物浦今場由加保踢正選,同路爾斯迪亞斯、達雲紐尼斯組成三叉戟,麥卡里士打喺中場拍住艾利洛、加雲貝治,後面有年輕嘅昆沙(Quansah)、干拿巴特利(Conor Bradley),門將係基利靴。富咸為收復首回合失地精銳盡出,魯爾占美利斯、韋利安俱正選搏殺。

紅軍始終技高一籌,11分鐘,迪亞斯用心口靚控,再推大位起腳省中人入網,先開紀錄。迪亞斯之後有球執雞,可惜紐尼斯被判越位,利物浦半場只領先1:0。換邊後,基利靴犯錯,可惜富咸中場皮利拉射中柱,戰至77分鐘,伊沙迪奧普追平1:1,最終利物浦兩回合合計贏3:2,晉身決賽鬥車路士。

同時,大家最關心嘅沙拿,已經喺前日返抵英國,不過由於傷勢較預期嚴重,未知能否重返埃及嘅非國盃陣營。初步估計,受腿筋傷嘅沙拿至少需要休戰至下月中。