同C朗分手後，曼聯迎來第一場賽事，英格蘭聯賽盃16強，主場2:0擊敗英冠球隊般尼，拉舒福特千里狂奔，個人表現式入波，一切如常，紅魔鬼繼續向前看。
曼聯官方為今仗製作觀戰特刊，第6-7頁，有名為「值得知道」專題，裏面有一段文字，講C朗離隊：
「經雙方達成一致，C朗上個月已經離隊，呢位葡萄牙巨星2次效力期間共出場436次，射入145球，幫助我哋贏得3個英超冠軍、1個足總盃冠軍、2個聯賽盃冠軍、1個歐聯冠軍、1個世冠杯冠軍。2008年，C朗亦獲得金球獎。」
「11月22日一份聲明中，曼聯對C朗嘅巨大貢獻表示咗感謝，並祝願佢及家人未來一切順利。」只有約200字，幾乎全係陳述事實中性詞，畢竟係決裂分手，無需惺惺作態，冷淡亦屬必然。
世界盃結束後，坦哈格畀利辛度馬天尼斯、麥佳亞、勞基梳爾、達洛治等後防主力休息，用卡斯米路串演中堅。效果當然冇咁理想，畀到般尼幾個危險入波嘅機會，好彩最後總算有驚無險。
中前場依然強陣，般奴費南迪斯、拉舒福特有份踢世盃8強戰，但今仗仍然冇得休息，同兩大新人王艾蘭加、加拿祖配合攻堅，單箭頭係安東尼馬迪爾。
左後衞雲比沙加少有出選機會，27分鐘貢獻一個精彩助攻，底線飛剷回傳中路，艾歷臣及時後上，近門撞射入網，先開紀錄。
拉舒福特喺世界盃表現突出，返到本土賽事，繼續顯示卡士，57分鐘由中場開始發難，邊推邊扭，擺脫幾個般尼後衞，禁區邊妙射遠柱入網，2:0，曼聯打入8強。
隨住C朗離隊，福仔地位更重要，消息指曼聯會開出40萬鎊周薪，作為續約條件，令佢超越迪基亞（37.5萬鎊），成為曼聯最高薪球員。
