倫敦雙雄齊齊過關。周三英聯盃第3圈，狀態低迷的車路士主場以1:0小勝白禮頓，打破近3場入球荒，總算止一止血；而阿仙奴則同樣以一球小勝賓福特，晉級16強。
車路士今場半強陣出擊，梅迪歷、彭馬正選披甲，支援下場停賽的中鋒尼高拉積遜，防中由摩西斯卡斯度帶住小將烏高卓胡，古古列拿亦列正選倒戈舊東家。至於白禮頓則收起蘇利馬治等主將，由法迪、三笘薰、祖奧柏度組成三叉戟。
上半場雙方互無紀錄，換邊後戰至50分鐘，由彭馬傳予積遜建功，射入全場唯一入球。值得一提的是，倒戈的門將山齊士今仗表現出色，比賽末段救出後備登場的馬治插水式頭槌，成為晉級關鍵功臣。
可惜，本身已滿營傷兵的車路士今仗再添傷兵，左閘芝維爾於比賽末段受傷，由於當時車路士已用盡換人名額，勉強要以10人完成賽事。領隊普捷天奴賽後親證：「軍醫會再幫芝維爾做詳細檢查，初步估計是大腿筋問題。」
芝維爾上季已曾因大腿受傷而休戰，如果舊患復發，預料需休戰大約一個月，令已有尼干古、巴迪亞舒尼、列斯占士、拉維亞等8名傷兵的車路士雪上加霜，加上古斯度、尼高拉斯積遜停賽，下場車路士只能以超殘陣出戰富咸。
另邊廂，阿仙奴今仗半力出擊，藍斯度把關、小將查利斯祖利亞、尼爾遜支援尼基迪亞，中場路維、夏維斯及佐真奴。開賽僅8分鐘，賓福特後衛辛卡回傳失誤，尼基迪亞搶走腳下球後傳予尼爾遜射入，最終順利小勝晉級。
同晚，利物浦以3:1擊敗李斯特城，至於另一場英超對決，愛華頓作客爆冷以2:1擊敗阿士東維拉。另外般尼茅夫、韋斯咸及富咸均順利過關。
16強抽籤結果
曼聯（超） VS 紐卡素（超）
車路士（超） VS 布力般流浪（冠）
韋斯咸（超） VS 阿仙奴（超）
般尼茅夫（超） VS 利物浦（超）
葉士域治（冠） VS 富咸（超）
愛華頓（超） VS 般尼（超）
埃克塞特（甲） VS 米杜士堡（冠）
曼斯菲（乙） VS 維爾港（甲）
