【英聯盃】今季第7次反勝!利物浦2:1富咸;高普3個超級 激讚鍾斯

真正Come back king!利物浦周四凌晨英格蘭聯賽盃4強首回合,主場又再先落後,最終反勝富咸2:1。領隊高普都話佢隊波慢熱,下半場先至識展示真正實力。

利物浦半力出擊,鋒線出路爾斯戴亞斯、迪亞高祖達拍艾利洛,加普同紐尼斯先列後備;另外仲有20歲干拿巴特利踢右閘,代替受傷嘅阿歷山大阿諾特。

上半場紅軍可以話係控制戰局,但富咸去到19分鐘,由韋利安盤射建功,富咸爆冷半場領先利物浦1:0。

換邊後紅軍㩒掣,達雲紐尼斯、加普先後入替,紐尼斯先喺68分鐘交畀居迪斯鍾斯,喺禁區邊起腳省中對手彈入網,3分鐘後,紐尼斯又回傳畀加普勁射得手,利物浦反勝富咸2:1,今季第7次完成逆轉。

利物浦再次展示後上王本色,本季各項賽事加埋共7次反勝,成為真正英格蘭反勝王。高普話:「我哋有啲慢熱,的確需要改善,不過我想講,下半場我哋嘅表現,先係真正嘅利物浦精神。」

高普賽後讚揚多位戰將,當中特別用三個「超級」嚟形容居迪斯鍾斯:「居迪斯對我哋嚟講係超級、超級、超級重要,我想講唔好意思,我之前冇畀你多啲上陣時間。」

兩軍將於本月24號進行次回合賽事,屆時輪到富咸主場。