曼聯低處未算低，奧脫福全面淪陷，創造兩大恥辱歷史，更神奇係坦哈格帥位似乎仲好穩陣，冇任何撤換領隊風聲。
周四凌晨英聯盃第4圈賽事，曼聯主場又慘敗，淨吞紐卡素3蛋。衛冕失敗之餘，紅魔上仗已喺「曼市打吡」主場吞曼城3蛋，連埋今場，係球會自1962年10月之後，61年來首次連續2場喺奧脫福輸3球或以上。夢劇院慘成「噩夢劇院」。今季頭10仗主場賽事輸5仗，更係自1930/31球季後、將近一百年的黑紀錄。
今場為上屆決賽翻版戰，曼聯同紐卡素都起用唔少副選，曼聯控球率較高，但依然唔識入波，形成死局。28分鐘，紐卡素由阿米朗左路勁射開紀錄。8分鐘後，賀爾禁區頂起腳直入死角，紐卡素半場已領先兩球。曼聯下半場毫無起色，60分鐘，紐卡素中場祖爾韋洛克輕鬆推到禁區頂，射成3:0完場。
曼聯近2次主場贏波，分別對賓福特同哥本哈根，已經唔係強隊，依然只靠補時連入2球，以及門將奧拿拿補時救出12碼先可以驚險獲勝，作為「夢劇院」嘅奧脱福淪落至此，實在令人唏噓。
錄得近百年最差開季戰績，主帥坦哈格向球迷致歉：「我知道我哋做到唔好，大家都責無旁貸，我喺度向球迷致歉。曼聯需要諗辦法復甦，行動要快。周六係另一場比賽（英超作客富咸），我哋要切法提升水平。」
大輪換之下，阿仙奴作客1:3負韋斯咸；利物浦則順利晉級，而車路士夫添出擊下以2:0擊敗布力般流浪，晉身8強。8強抽籤如下：
利物浦 VS 韋斯咸
愛華頓 VS 富咸
維爾港（甲） VS 米杜士堡（冠）
車路士 VS 紐卡素
