【英冠升班附加賽】最值錢決賽!掀動14億收益!修咸頓1:0列斯聯 相隔一季即返英超

足球壇最昂貴決賽,英冠升班附加賽周日晚溫布萊球場舉行,結果修咸頓1:0力挫列斯聯,降班只有一季,立即升番上英超。

除修咸頓外,另兩支升班球隊係李斯特城同葉士域治,佢哋分列冠亞軍,得到直接升班資格。由英超降落英冠,分別係盧頓、般尼、錫菲聯,3隊都屬「原機遣返」,升英超一季即玩。

點解話呢場波係最貴決賽?據2022-23賽季英超轉播分紅數據,英超所有20隊均能分得超過1億鎊收入,而且呢個只係分紅,未包括商業收入增長。據統計,英冠附加賽決賽勝方將於接住3個賽季,實現至少1.4億鎊的收入增長,即係約港幣14億。

今場波開咗24分鐘,阿當岩士唐為修咸頓射入價值連城嘅一球。之後修咸頓全面縮後穩守,基本上成為列斯聯天下,但面對嚴密防線,具威脅攻門欠奉,最終列斯聯以0:1飲恨,下季繼續留喺英冠。

修咸頓上季降班,一季後立即回升英超,李斯特城亦係降班後一季,立即成為英冠盟主,風光返去頂級聯賽。「聖人」同「狐狸」夠厚底,預計有抗衡實力,唔會咁易做升降機。至於連續兩季升班、一口氣殺上英超嘅葉士域治,就要睇領隊麥堅拿抗唔抗拒到大會利誘,如果呢位神奇少帥離隊,葉士域治散晒都唔奇。