吃不到的葡萄是酸的，皇馬主席皮里茲完美演繹？呢位喺球壇呼風喚雨嘅智慧尊者，日前受訪嗰陣，再次講起增兵問題：「我哋使乜買前鋒呀，有賓施馬，就算夏蘭特嚟到都係做後備㗎咋！」
皇馬早前喺一致被睇淡吓過關斬將，連贏PSG、車路士、曼城同利物浦，再次舉起歐聯獎盃，喺淘汰賽踢走當今球壇幾近最強嘅4大勁旅，絕對係含金量最高嘅盟主。
但嚟到轉會窗，呢支西甲班霸卻處處撞板，原本吹到新世代兩大球王夏蘭特、麥巴比會同時來投，點知最尾一個都冇，麥巴比仲要臨門撻Q，乜面都冇晒。
齋從技術層面睇，其實皇馬買唔到麥巴比，對戰力影響未必太大，黃金中場線隨住曹亞文尼加盟，加埋卡馬雲加同華維迪，基本上已經搵好晒接班人，但從商業角度睇，麥巴比撻Q，對西甲同皇馬嘅品牌確實幾大打擊。
西甲賽會主席泰巴斯率先開火，投訴成功同麥巴比續約嘅PSG、買咗夏蘭特嘅曼城，持續違反財政公平條例，要求UEFA徹查呢件事，仲委託埋法律顧問公司，準備向PSG同曼城提出訴訟。
而皇馬會長皮里茲仲加把口，話夏蘭特嚟到皇馬，最多都只係做後備：「我哋由頭到尾都冇話要簽夏蘭特，佢嚟到皇馬，都只係賓施馬嘅後備， 況且夏蘭特係一位好偉大、好神奇嘅球員，我哋唔可以買咗佢，然後又唔出佢㗎嘛！」
見慣世面嘅老江湖，講句嘢都話中有話，有料。
