今田晚聯賽盃16強開打，焦點除咗曼聯對紐卡素嘅上屆決賽翻版戰，仲有阿仙奴作客韋斯咸呢場全英超對決，迪勤懷斯將會首次倒戈。
迪勤懷斯今夏以1.05億鎊，由韋斯咸轉投阿仙奴，成為球壇史上最高轉會費嘅英格蘭球員，經過季初嘅比賽，相信唔少球迷都會認同呢單Deal係物有所值。
迪勤懷斯自14歲加盟韋斯咸以來，一向忠心耿耿，如今佢已成為24歲嘅阿仙奴當打球星，為球會帶來一筆極可觀嘅收入，代替佢嘅禾特包斯表現亦唔差，今晚懷斯重臨成名地倒戈，會唔會仍然被槌仔粉絲開汽水？
「我覺得唔會。」阿迪達話。「每次懷斯講起韋斯咸嘅一切，佢都係眉飛色舞、讚不絕口，我相信球迷對佢亦一樣。今次係懷斯第一次以阿仙奴球員身份重返老地方，我認為係一個美好嘅時刻，佢會得到掌聲，而唔係噓聲。」
「我都試過倒戈，我覺得係一件好事，因為咁樣，你就可以睇到球迷對自己嘅真實感受，同埋你喺舊東家嘅貢獻。」
懷斯近期弗到爆，先喺倫敦打吡對車路士入咗球靚波，最近兩仗對西維爾同錫菲聯都貢獻助攻，阿仙奴至今仍保持本土賽不敗金身；至於韋斯咸就跌晒Watt，近3場輸晒，包括主場輸畀護級份子愛華頓。
