【聯賽盃】離任前留低最珍貴寶藏 高普:呢個係我贏過最特別嘅錦標,因為根本冇可能…

利物浦殘陣應戰英聯盃決賽,喺最後關頭戰勝天價球員一堆嘅車路士,套用加利尼維利比賽期間嘅評述:「依家係由高普嘅細路仔對住一堆數10億鎊嘅軟腳蟹。」

最後結果,利物浦憑雲迪積克加時末段頭槌建功,贏1:0捧盃。實在太難能可貴,領隊高普雖然捧盃無數,但亦認定呢個係任領軍生涯至今,最特別嘅錦標。

「超過20年,但呢個係我所贏過最特別嘅一個錦標,絕對係無與倫比。」英聯盃係高普公佈季尾離隊後首個錦標,難怪佢賽後情緒激動。距離離任前仲尚有機會爭逐英超、足總盃及歐霸盃,贏4冠不是夢。

傷兵太多,到下半場尾場,幾乎用盡青訓球員,對住對手億億聲嘅億萬大軍,高普都覺得難以置信:「絕對瘋狂,冇可能!呢支球隊,呢個陣容,呢個學院……充滿住個性,好自豪,我係今晚嘅一部份。」

利物浦今場缺少沙拿、達雲紐尼斯、蘇保斯拉爾、艾利臣比加、居迪斯鍾斯、阿歷山大阿諾特及祖達等常規主力,喺一場決賽裏面,高普唔保守,唔會只信賴剩餘嘅一隊球員,反而大膽派遣波比奇勒、麥干奴、丹斯等青訓球員,入替略見疲憊嘅主將。高普賽後話:「我深信呢班細路做得到,利物浦需要新血,需要年青人,佢哋做好咗自己嘅工作。」

「呢班後生仔同一隊一齊訓練咗好長時間,清楚知道我哋要點踢。當你見到場上隊友踢得好痛苦,呢個時候,你就必須要作出貢獻。」高普補充:「唔單止呢班細路,仲有艾利諾同遠藤航又如何?踢完120分鐘,以最僵硬雙腳,最後走上頒獎台,仲有基利靴、干拿巴特利……佢哋都係最好。」

高普季後將會卸任紅軍領隊,今次以呢個方式捧聯賽盃,宣示已為繼任者鋪好一條光明前路,二隊亦有龐大的人才資源,可以喺未來無縫接軌。單係呢個貢獻,無疑令紅軍更感念高普,更勝冠軍榮譽。