萬眾矚目嘅英格蘭聯賽盃決賽，曼聯憑卡斯米路及拉舒福特先後建功，以2比0擊敗紐卡素封王，領隊坦哈格奪得上任後首個錦標，打破球會6年錦標荒。
「冠軍陸續有來！」成為聯賽盃史上第一位荷蘭籍冠軍教頭，坦哈格封王後嘅豪情壯語，最終會唔會成為事實？大家要拭目以待，因為數據顯示，喺佢手上嘅牌，大部份都踢出自己職業生涯巔峰。
當中當然包括今場MVP，「技安」卡斯米路。呢位世一防中，今仗唔單止入波，即使係防守、派牌、控制節奏等等，皆達大師級水平，喺領先兩球後仍然喝住班隊友嘅一絲不苟，亦領唔少球迷肅然起敬。
睇番OptaJoe數據統計，連埋今場，「技安」近9次踢決賽（4次歐聯、3次世冠盃決賽、1次國王盃），全部都係勝利一方，超恐怖！
賽後，當眾將開始慶祝，「技安」第一時間做嘅，係走埋去隊長般奴費南迪斯身邊，鬧佢喺完場前反擊3打2，但竟然貪功冇傳波，告誡佢應該珍惜每一個入球機會，展現真正嘅大佬風範。
連埋今場，「技安」今季為曼聯貢獻5個入球5次助攻，總共參與10個入球，呢個數據，卡斯米路喺皇馬要踢68場波先做到，加埋佢最近12場入4球，而佢之前嘅89場波，亦只係入咗3球，可見「技安」喺坦克麾下攀上職業生涯最高峰，曼聯今夏用呢8000萬鎊轉會費，絕對係物有所值。
同樣進化嘅，當然仲有拉舒福特。福爺喺今季聯賽盃每輪都有入波，目前已斬獲25球，超越上季嘅C朗都不特止，2023年轟入14球，亦係五大聯賽中第一人。
尋晚溫布萊球場座無虛席，87,306人見證一場精彩嘅聯賽盃決賽。兩軍快打快，今場嘅焦點之一、紐卡素3號門將卡利奧斯，冇花生友預期嘅出醜，反而表現唔曳，當然，最穩陣嘅依然係比賽初段不斷受壓嘅迪基亞。
曼聯企穩陣腳後拎番節奏，33分鐘，勞基梳爾罰球斬中，卡斯米路頭槌破網。6分鐘後，拉舒福特同韋格賀斯撕破紐卡素防線，福爺入到禁區起腳，省到保治文再彈高，笠死卡利奧斯，贏到2比0，曼聯換邊後亦保住勝果，捧下坦克年代嘅首個冠軍。
