大家仲記唔記得保贊？曾經嘅美斯接班人，幫巴塞隆拿青年軍轟入近900球，可惜正當35歲嘅阿根廷球王再上高峰，而只得32歲嘅保贊，就已經喺3月宣佈高掛球靴。
喺巴塞青年軍打破美斯紀錄，以17歲之齡同朗拿甸奴、沙維、恩尼斯達及美斯等巨星共事，4次西甲冠軍、2次歐聯冠軍……一切嚟得太易。
然後羅馬、A米、阿積士、到史篤城、緬恩斯、艾拉維斯、蒙特利爾衝擊，到最終站神戶勝利船，職業生涯係高開低走嘅極致。
一切源頭，可能就係個頭開得過份地靚：「嗰陣我先17歲，同美斯用同一個更衣室，當時巴塞仲有朗拿甸奴、亨利、沙維、小白……但我就竟然被稱為美斯、朗拿甸奴接班人，呢種唔係年輕球員需要有嘅壓力……」保贊日前接受《talkSport》訪問，攤喺梳化苦笑咁講。
「好多謝亨利、恩尼斯達同伊度奧，佢哋不斷咁開解我……」當提到第二個家史篤城，保贊終於再次面露笑容：「其實我真係冇後悔，史篤城好正、英超嘅氣氛好正，我好感激曉士，係佢邀請我去史篤城，呢間球會唔大，但所有職球員、球迷全部都勁Nice，喺呢度踢波係我最開心嘅時間，我終於搵番屋企嘅感覺。」
踢過咁多間球會，邊個係保贊最強嘅隊友、最強嘅對手？美斯、C朗？答案相信冇咩人估到：「最勁嘅隊友係阿拿奧杜域、最強嘅敵人就係尼高路簡迪，佢真係好惡搞！」
「另外我好想講，晏菲路球場真係冇得頂，超正！呢個球場，係大家一定要去一次嘅地方，去感受嗰度嘅氣氛，去合唱《You will never walk alone》！」似乎一如保贊所講，佢開心嘅回憶，就只停留喺2014年到19年之間，亦即佢效力史篤城嘅時間。
事過境遷，已經掛靴嘅保贊，亦開始為佢嘅新目標而奮鬥：玩碎石單車、考教練牌。原來保贊同恩尼斯達，喺巴塞隆拿附近嘅郊區開咗間名為GUAVA嘅單車品牌公司：「我好鍾意踩單車，退休後亦因為呢項運動，識咗好多新朋友，好開心。」
「不過，我仲好後生咋，7月我就會開始讀教練課程，希望嚟緊有機會再喺球場出現，用另一個角色同大家見面。」
