又係美斯！美職聯賽盃4強，1哥FC辛辛拿提主場迎戰包艇嘅國際邁亞密，主隊一度領先2比0，但球王美斯再一次挺身而出，交出兩個靚助攻，帶領邁亞密絕地扳平，氣勢如虹下喺加時更一舉反勝，及後雖然被扳平，但仍憑互射12碼勝出，昂然殺入決賽，美斯有機會一登陸美職就做雙冠王，厲害厲害！
FC辛辛那提目前無論喺東岸定係總積分榜，都係排第一，仲要係放甩7至8分嗰隻，戰鬥力絕對唔嘢少，亦係美斯登陸美職後，所遇到最強嘅對手。
至於邁亞密暫時喺總積分榜同東岸都係墊底，不過自從美斯嚟咗之後，吸引到佐迪艾巴同布斯基斯先後加盟，佢哋亦由魚腩搖身一變成為勁旅。
美斯登陸美職後，只曾出戰北美聯賽盃，但就一路領軍過關斬將，場場有波入，7戰轟入10球，最終順利封王。
嚟到雙冠王次關、美職聯賽盃4強賽事，FC辛辛那提初段攻勢較有威脅，喺上半場18分鐘，由雅高斯達門前先開紀錄，換邊後華斯基斯禁區外遠射得手，領先至2比0。
眼見邁亞密大勢已去，美斯再一次挺身而出，不過今次佢唔係入波，而係送出兩個助攻，68分鐘，美斯左路開出罰球，甘賓拿一頂破網追留粒。
戰至補時7分鐘，美斯斬波入禁區，位置啱啱好，甘賓拿再施展頭槌破網，奇蹟追和2:2，美斯同一眾隊友瘋狂慶祝，將比賽帶入加時。
加時上半場僅3分鐘，佐迪艾巴截到個波後交前，基列夫斯夫靚直線，祖斯夫馬天尼斯搞掂，由落後兩球到連轟三球，完成驚天逆轉，不過辛辛那提貴為1哥，當然有料到，久保裕也完場前勁射扳平3:3，比賽進入互射12碼階段，最終辛辛那提1個宴客，邁亞密則5射全中、順利殺入決賽！
美斯連續8場參與入球，總共交出10個入球、3次助攻，對上一次創造呢個數據嗰陣，係2018/19球季。
