唔踢大波，轉玩細波！「大聖爺」加里夫巴利宣布退役，盛傳會轉戰佢最心愛嘅高爾夫球比賽。
今時今日，年紀唔算大，只係33歲，仲可以踢多兩三年，但加里夫巴利周二(10日)凌晨，突然喺社交網站宣布掛靴，結束17年嘅職業足球員生涯。
作為威爾斯國腳，加里夫巴利堅巴閉，為皇家馬德里5奪歐聯冠軍，亦係威爾斯國家隊史上上陣同入波最多球員，成就非凡。
上年6月，簽約美職FC洛杉磯18個月，但只係效力半年就宣布退休，卡塔爾世界盃前，佢講過會繼續足球生涯，點知突然轉軚，分組賽最後一輪對英格蘭，成為佢足球生涯最後一仗。
加里夫巴利話：「我決定即時結束球員生涯，呢個行動，已經過深思熟慮。能夠實現夢想成為職業足球員，我覺得非常幸運，無論將來如何發展，17年球員生涯係我人生巔峰，已難再複製，係時候向下一話峰進發。」
大聖爺喺球壇留下一幕幕經典，出身自修咸頓，轉投熱刺走上巨星之路，喺歐聯發揮狂野時速，爆破當時世一右閘馬爾干，爆到呢位巴西國腳懷疑人生……
2013年，巴利以世界紀錄1億歐元，由熱刺轉投皇家馬德里，喺皇馬9年，成為當世最強翼鋒，歐聯決賽驚天倒掛、遠射直接令卡列奧斯從此玩完、國家打吡傳波畀3秒後嘅自己……
曾經贏過16項錦標嘅大聖爺，喺國家隊層面，亦係繼魯殊、曉士、傑斯之後，威爾斯最強巨星，2016年歐國盃，更帶領威爾斯歷史性殺入4強。
可惜巴利近年不斷受傷患影響，水準全面下滑，而且轉而醉心哥爾夫球，亦被指對足球失去熱誠。依家退休，盛傳佢會嘗試轉型，成為職業高爾夫球手，以另一個身份，喺運動世界繼續馳騁。
