尋晚球王終極戰，相信唔少球迷都回味到依家，5:4入球大騷、見識到幾位球員嘅人情世故，最重要嘅，係兩大球王交鋒嘅經典場面，相信日後未必有機會再見到喇。
C朗身為利雅得明星隊隊長，加上今場係佢喺沙特嘅地標戰，熱血搏命就梗，甚至應該係場內22人中，最有鬥心嘅一個。
PSG畀足面，美斯、麥巴比、尼馬、沙治奧拉莫斯正選，而利雅得明星隊當然削得多，除咗C朗，最有卡士嘅係前拜仁中場古斯達禾、波圖射手馬列加同踢過廣州恒大嘅泰列斯卡。
只係踢咗3分鐘，美斯就瀟灑開紀錄，鬥心爆棚嘅C朗，34分鐘頭槌攻門，PSG門將基羅拿華斯出迎打手槌，但就打中C朗塊面，雖然有瘀傷，但呢一拳亦換嚟一球12碼，作為C朗嘅星級鐵粉，麥巴比亦有輕撫偶像塊面、了解傷勢。C朗自己處理極刑，取得沙特生涯首個入球。
之後祖安巴尼特領紅，PSG踢少個，實力距離總算拉近番少少，馬昆奴斯之後入波，PSG再度領先，之後尼馬更博到12碼，不過佢相當識玩、主射宴客。上半場補時階段，C朗力壓沙治奧拉莫斯，頭槌勁頂中柱，再把握解圍失誤射入，彈跳力及反應仍然一流，明星隊扳平2:2。
換邊後冇耐，沙治奧拉莫斯、明星隊南韓中堅張賢秀及麥巴比12碼先後破門、踢成4:3，戰至61分鐘，C朗離場，PSG亦收起美斯，球王對決正式落幕，PSG最後贏5:4。
賽後C朗當選今場MVP，油王笑到四萬咁口，球迷又有入球騷睇，可謂皆大歡喜。美斯之後喺IG出條同C朗相擁嘅短片，C朗亦有出po話好開心見番啲老朋友，其中一幅相係佢攬住美斯。二人IG說明一切，雖非深交，但亦非敵人，兩大球王之間只有惺惺相惜、互相尊重。
C朗下場比賽會係年初二凌晨，艾納斯喺沙特聯賽主場對伊蒂法克。
