C朗轉戰沙特阿拉伯後，今晚將會首度披甲，以隊長身份代表利雅德明星隊，火併法甲班霸巴黎聖日耳門。
絕代雙驕鬥足十幾年，因對方而不斷求進、突破自己，二人能夠同時雄霸球壇十幾年，絕對係足球歷史上首次。可以講，冇C朗，未必會有今日嘅美斯；冇美斯嘅存在，亦未必有自我鞭策嘅C朗。
隨住美斯世界盃封王，C朗離開主流聯賽，世一之爭似已告一段落，據消息指，美斯將續約PSG、拒絕沙特希拉爾聘約，換句話說，兩大球王今晚一戰，除咗係2020年12月後首次，亦極有可能係最後一次。
沙特體育部長Turki Al-Sheikh，日前為C朗戴上隊長臂章，確定C朗會以利雅得明星隊隊長身份，出戰美斯、尼馬同麥巴比嘅聖日耳門。
由於C朗自世界盃後未有正式比賽，狀態不足，據報今場只會上陣45分鐘，而法媒《RMC》報導，聖日耳門今次去中東勁賺1500萬歐元，但合約列明，美斯、麥總同尼馬必須落場，至於兩大球王會否同時較技，真係要到時先知了。（now 639今晚深夜1點直播）
