'

【球王感言】圓夢無需爆喊 只有幸福笑容 美斯:我已無所求 只想繼續享受足球!

終圓長達15年尋夢之旅,但賽後未如所料激動爆喊,反而露出滿足幸福笑容,球王已無所求,到達另一境界。

世盃史上最峰迴路轉決賽,阿根廷互射12碼擊敗法國,美斯經歷5屆決賽周、16年世盃追夢之旅,終於有個美滿結局。

35歲美斯,足球生涯射入近800球、擁有42個球會級錦標、史上最多7個嘅金球獎,足球生涯最後時刻終嘗世盃冠軍滋味,正式加冕球王。此時此刻,右手攬世盃、左手抱金球,美斯話:我已無所求、只想享受足球。

美斯在世盃決賽攻入2球,互射12碼階段再為阿根廷建功,同時創造一堆世界紀錄,包括世盃史上上陣次數最多球員、世盃史上上陣最多分鐘球員、世盃史上最多全場最佳獎等等。之前4屆,美斯從未喺淘汰賽取得入球,但今屆16強開始到決賽均有入球,同樣史無前例,最後亦成為史上首個2次榮膺世盃金球獎球員。

2006年首次出戰世盃,18歲美斯嶄露頭角,不過8強止步、2010年世盃首擔大旗,8強被德國淘汰,2014年美斯率領阿根廷殺入決賽,加時又被德國絕殺;上屆阿根廷則16強黯然出局。已過30歲,美斯世盃夢愈趨渺茫,今屆首仗更意外不敵沙特阿拉伯,更令球迷擔心美斯會落得分組賽出局嘅悲情結局。

但以上一切,原來只係球王加冕前,漫長苦難試煉。

球會級別、個人層面已贏盡一切,實現世盃冠軍最後拼圖後,美斯表示:「好明顯,我想要世界盃冠軍,填滿個人足球生涯,我已經再無所求。職業生涯尾聲,我得到美洲國家盃冠軍同世界盃冠軍……用呢個方式實現夢想,真係太瘋狂,但我知道,上帝會將呢份禮物帶畀我。」

有傳美斯將會功成身退,結束國際賽生涯,但美斯宣布會繼續為國征戰:「我愛足球,我享受成為阿根廷國家隊一員,我想以世界冠軍身份,享受多幾場阿根廷賽事。」