【球星傳】球員自強營商天花板!福布斯估算 法明尼身家至少300億歐元!

球員賺大錢嘅例子多到數唔晒,但好似前阿仙奴中場法明尼咁,間公司總值超過300億歐元,就真係少之又少喇。

好多老一輩嘅球迷,都聽過呢句說話:「好多美好嘅嘢,其實都係免費,例如陽光、空氣、法明尼。」法明尼整個職業生涯,無論效力馬賽、阿仙奴定AC米蘭,基本上都唔使球會使一毫子。

司職防中嘅法明尼,雖然喺球隊稱不上絕對主力,但絕對好使好用、任勞任怨,所以即使佢實力唔算太突出,但喺整個球員生涯,賺到超過3000萬歐元嘅人工。

咁究竟法明尼係喺幾時開始逆轉佢嘅人生?答案係喺效力阿仙奴期間,法明尼選擇學習嚟提升自己。佢先後獲得法律及商業投資學位,之後一次機會,佢遇到意大利企業家格奈特,研究大規模生產乙醯丙酸嘅方案,佢哋創辦嘅GF生化公司,亦係世界上第一間能夠大規模生產乙醯丙酸嘅公司。

乙醯丙酸點解咁值錢?因為乙醯丙酸被認為係石油嘅理想替代品,乙醯丙酸既安全又環保,亦能夠用之生產可降解嘅塑料制品,符合低碳、環保概念。法明尼退役後,不斷擴大公司規模,並且同多個品牌達成協議,目前公司總值已超300億歐元!

福布斯曾對法明尼同C朗嘅財產進行評估,最終得出結論,就係法明尼嘅身家,大概係C朗嘅60倍!要知C朗已經係球壇數一數二嘅有米巨星,但同法明尼相比,明顯有一大段距離。

對法明尼嚟講,收購世界上任何一間球會,都係佢以一己之力做得到嘅事。現年只得40歲嘅法明尼,曾經暗示未來有機會會收購佢最心愛嘅阿仙奴,以及母會馬賽,唔知幾時會付諸行動呢?