上集講咗查爾頓、迪保亞、托尼、保定同尼維利兄弟，今集除咗會講多5對兄弟，仲會介紹番筆者認為係現役最強嘅兄弟兵，迪奧同盧卡斯靴南迪斯！
迪奧靴南迪斯、盧卡斯靴南迪斯（法國）
現役球員中最強、最當打嘅兄弟兵，應該就係佢哋，26歲嘅盧卡斯靴南迪斯同24歲嘅迪奧靴南迪斯。兩兄弟都係喺馬體會出道，大佬盧卡斯上位快啲，係法國2018世界盃大軍嘅核心成員，2019年，盧卡斯以破德甲轉會費嘅紀錄（8000萬歐元）轉投拜仁慕尼黑，以後衛嚟講，身價都幾誇張。
大佬已拎勻德甲、歐聯、歐霸、世冠、世界盃同歐國聯冠軍，而迪奧成名路較為崎嶇，喺馬體會冇乜機會，外借到艾拉維斯有出色表現，但之後轉投皇馬又係坐多過踢，直至2019轉投AC米蘭後大爆發，前季成為盤球最多嘅意甲後衛，上季就係入球同助攻最多嘅後衛，幫AC米蘭重奪意甲冠軍。佢喺2021年首度入選法國國家隊，同大佬一個踢左翼衛，一個踢中堅。
米高勞特立、白賴仁勞特立（丹麥）
講完現役最強，當然要講番啲經典嘢。被譽為最華麗嘅兄弟兵，尤其係大佬米高勞特立，更加係丹麥史上最偉大嘅球員，超級大腦，曾經踢過祖雲達斯、巴塞隆拿同皇馬，難得地同時成為魯營及班拿貝傳奇，可惜，佢足球生涯嘅最大遺憾，就係唔能夠成為丹麥歐國盃童話嘅一員。
當年米高、白賴仁同國家隊主帥尼爾遜炒大鑊，憤而退出國家隊，後來丹麥以後補身份參戰92歐國盃，尼爾遜游說二人復出，白賴仁回心轉意，而米高則選擇繼續渡假，最終白賴仁領軍，爆大冷封王歐洲。
白賴仁喺球會成就雖不及米高，但喺國家層面上，絕對係同大佬並駕齊驅。之後二人復出國家隊，98世界盃更成為兩兄弟最後發光發熱嘅國際賽舞台，丹麥殺入8強對巴西呢場波，更成為史上經典賽事之一。
恩沙基、施蒙尼恩沙基（意大利）
球員時代嘅兩位恩沙基，係典型嘅龍兄鼠弟代表。恩沙基被譽為破越位及禁區之王，把握力極強，效力過祖雲達斯、AC米蘭呢啲頂級豪門，捧過3次意甲冠軍、兩次歐聯冠軍同世界盃冠軍，成就斐然。細恩職業球員生涯雖然唔差，曾經隨拉素封王意甲，惟比起大佬就差得遠。但講到教練生涯，細恩就勁得多，帶住隊拉素踢到曉飛，上季過檔風雨飄搖兼財困嘅國米，但一樣拎到亞軍，反而大恩目前教緊意乙布雷西亞，之前曾經被炒，只係因合約中有特別條款，大恩先可重返球會。
法比奧達施華、拉菲爾達施華（巴西）
孖仔法比奧同拉菲爾，喺2008年由富明尼斯轉投曼聯，雖然二人冇想像中咁擔起大旗，但表現尚算稱職，幫曼聯拎咗3個聯賽冠軍。目前兩兄弟已經32歲，法比奧踢緊南特，而拉菲爾已返祖家巴西搵食，效力保地花高。
夏薩特、杜根夏薩特（比利時）
2012年，係夏薩特兄弟足球生涯嘅轉捩點，當時車路士喺里爾撬走夏薩特，同時又喺朗斯買埋佢細佬杜根夏薩特，以為兩兄弟會拍住上，可惜杜根喺未有上陣機會嘅情況下，於2015年轉投慕遜加柏，而佢大佬就成為史丹福傳奇，超過100個入球、兩個英超冠軍，令佢舉世矚目咁加盟皇馬；同時，杜根因為喺慕遜加柏嘅出色表現，被多蒙特收歸旗下。之後嘅故事大家都知，目前杜根嘅身價已經超越大佬，盛傳新豪門紐卡素有意出手，希望佢再戰英超舞台。
堤亞高艾簡達拿、拉芬夏艾簡達拿（西班牙、巴西）
堤亞高同拉芬夏都曾經喺巴塞隆拿青年軍受訓，老竇係94巴西冠軍成員馬仙奴，兩人都代表過西班牙小國腳，後尾拉芬夏決定代表巴西，同大佬各自修行。堤亞高喺巴塞、拜仁同利物浦已贏盡一切球會級榮譽，被譽為世界級全能中場，而拉芬夏就處於人球狀態，之前不斷被巴塞隆拿外借，到轉投巴黎聖日耳門後，仍難逃被借走嘅命運，預計拉芬夏來季仍然要以借將身份為其他球會征戰。
