哥倫比亞翼鋒路爾斯戴亞斯，季中由波圖轉投利物浦後，可謂踏上巨星路，出身自巴蘭基亞青年軍嘅佢，目前只係25歲，絕對係大把世界。
唔講唔知，原來呢位大紅人有個細佬叫捷西斯戴亞斯，同樣喺巴蘭基亞青年軍受訓，係哥倫比亞小國腳，日前落實加盟波圖，而佢更只得18歲，捷西斯能否複製大佬嘅巨星之路，拭目以待。
根據《每日電訊報》統計，每10位喺青年軍受訓嘅球員，只有一位能夠真正成為職業球員，呢個已經係講緊入到青年軍嘅數字，未計無數連青年軍都入唔到嘅人。所以，成為職業球員已經好難，成為球星更難上加難，同一時間兩兄弟成為職業球星，更加係難上加難再加難。
當然，難度幾高，總有人做得到。《一體》盤點十對球壇兄弟兵，由於太長，分上、下兩集出。
卜比查爾頓、積查爾頓（英格蘭）
查爾頓兄弟，係世界盃史上第二對冠軍兄弟兵。（第一對係1954 年西德嘅Fritz Walter及Ottmar Walter。）卜比Sir係第一位獲得金球獎嘅英國人，喺曼聯、甚至國際球壇嘅地位唔使多介紹，而積查爾頓則係後衛，列斯聯忠臣，整個英格蘭職業生涯都喺列斯聯渡過，捧過英甲、英乙、足總盃同聯賽盃冠軍，陪球會走過高山低谷。
法蘭迪保亞、朗奴迪保亞（荷蘭）
要數最經典，筆者認為非迪保亞兄弟莫屬。除咗因為球壇嘅成就及肯定，最重要係呢對孖仔形影不離，同樣成名於阿積士，贏咗5個荷甲、1次歐聯冠軍，之後輾轉喺巴塞隆拿重聚，到臨收山前同樣踢過格拉斯哥流浪，再一齊去艾雷恩、沙馬爾FC度掘金，堅係兩兄弟拍住上，有你有我。
菲臘尼維利、加利尼維利（英格蘭）
要數英超最成功嘅兄弟兵，菲臘佬同加利佬應該都數一數二。兩位曼聯青訓產品，加利佬喺92年獲處子戰機會，菲臘佬則要到94年先第一次為曼聯披甲。兩人喺曼聯並肩作戰，合作奪取6次英超冠軍，2005年菲臘佬轉投愛華頓、分道揚鑣。掛靴後，加利佬曾與菲臘執教華倫西亞，但冇幾耐就被炒，菲臘佬目前幫碧咸打緊工，教緊國際邁亞密。
高路托尼、耶耶托尼（科特迪瓦）
托尼兩兄弟，可以話代表住英超兩代王朝。高路托尼為阿仙奴出賽逾300次，係阿仙奴04不敗功臣之一，09年轉投曼城後，佢細佬耶耶之後亦由巴塞來投，兩兄弟聯手，助曼城喺2011/12球季首奪英超冠軍，開創王朝。此外，托尼兄弟喺2015年助科特迪瓦捧起非洲國家盃，成為一時佳話。
謝路美保定、奇雲保定（德國/加納）
佢兩個係同父異母嘅兄弟，不過奇雲保定就決定代表老竇祖國加納，而謝路美則代表二人出生地德國。二人際遇亦大不同，細佬謝路美保定喺拜仁取得巨大成功，曾連續7次封王德甲，更加捧過世界盃，而大佬奇雲則成球壇浪人，踢過樸茨茅夫、AC米蘭同巴塞隆拿，拎過意甲同西甲冠軍，目前回流踢哈化，而謝路美就踢緊里昂。
