英格蘭職業足球運動員協會（PFA）公佈上季各獎項得主，利物浦王牌沙拿當選球員先生，而最佳11人亦已選出，早前未能入選球員先生候選名單嘅孫興民，竟然離譜到連最佳11人都冇份，震驚球壇！
孫仔上季射入23球，一個12碼都冇，含金量比另一位得主沙拿更高，退一萬步，就當利物浦同熱刺嘅供應量係一樣、含金量一樣，都冇理由一個係球員先生，另一個連最佳11人都唔入圍啩！
上季最佳11人，陣容如下：
門將：艾利臣比加（利物浦）
後衛：阿諾特（利物浦）、 VVD（利物浦）、魯迪加（車路士）、簡斯路（曼城）
中場：奇雲迪布尼（曼城）、艾簡達拿（利物浦）、貝拿度施華（曼城）
前鋒：沙拿（利物浦）、C朗（曼聯）、文尼（利物浦）
上季英超亞軍利物浦，一共有6人入選，而冠軍曼城得3個，咁都算喇，前線竟然有C朗、文尼，但都冇金靴孫興民份……堅無言……
PFA喺1974年開始頒發各大獎項，得主係由球員工會成員選出，簡單啲講，即係行家。獎都頒咗咁多年，點都有啲爭議，以下呢11位英超歷代球星，原來都未入選過年度最佳陣容，部份講出嚟，你都未必信！
門將：連拿（利物浦）
後衛：艾斯派古達（車路士）、布魯士（曼聯）、卡維奴（車路士）、溫特本（阿仙奴）
中場：龍格保（阿仙奴）、艾辛（車路士）、摩迪（熱刺）、奧斯爾（阿仙奴）
前鋒：蘇拿（車路士）、科拿（利物浦）
註：遺珠11人由football365選出
連拿：
喺英超生涯保持136次不失球紀錄，喺2009/10球季，更以75％選票大勝，當選利物浦年度最佳球員，可惜最終喺PFA最佳11人中輸咗畀赫特。
艾斯派古達：
喺英超打滾咗10年，穩定性極高，2013/14球季，艾斯派古達獲選為車路士年度最佳，但喺PFA投票中，卻輸畀史密斯高文。
布魯士：
曼聯超級定海神針，但竟然從未入選過PFA最佳11人，反而佢拍檔巴里斯達入過5次，仲喺92年做埋球員先生。
卡維奴：
車路士王朝功臣，有幾穩陣唔使多介紹，可惜佢嘅風頭長期被泰利掩蓋，即使2008年當選車路士最佳球員，但一樣落選PFA。費蘭度托利斯曾經講過，卡維奴係最可靠嘅後衛，泰利只係第二。
溫特本：
阿仙奴老牌左閘，喺頂級聯賽出場178次，不過佢嗰個年代，的確有唔少勁出名嘅英超左後衛，例如艾雲、邦尼拜、拿索斯等等，冇計。
艾辛：
堅離譜，車路士王朝嘅中流砥柱，防守勁夠爛打，林柏特、謝拉特長期霸住個位，算，但之後艾辛先後輸埋畀史高斯、法比加斯、費查……
摩迪：
講到未必有人信，5屆歐聯冠軍得主，喺熱刺時竟然未入過PFA最佳11人，2011年，費格遜大讚摩笛係英超最強球星，但當年最佳11人投票，佢輸咗畀拿斯尼同韋舒亞。
龍格保：
就係咁離譜，不敗奪冠重臣之一，係2002年英超最佳球員，當時仲被譽為英超近10年嘅最強外援，但就係冇得入PFA最佳11人，相當頂癮。
奧斯爾：
2015/16英超助攻王、兩次每月最佳球員、阿仙奴年度最佳球員，但當季入選PFA best 11嘅4人中場線，係馬列斯、迪利阿里、簡迪同埋皮耶。
蘇拿：
家傳戶曉嘅意大利巨星，有評論話蘇拿喺97年之所以唔入選，係因為佢96年11月先加盟車路士，唔夠時間喺PFA截止投票前表演，而之後嗰幾季蘇拿入球量亦唔算好高，以至喺當時鋒線得兩個名額下，相當蝕底。
科拿：
天才前鋒，喺95/96賽季勁入28球，而之前嗰季就入25球，但可能係人緣關係，令佢輸畀費迪南同埋瑟頓，冇得同鐵膽舒利亞做PFA best 11拍檔。
