繼VAR之後，球壇又有「驚世」「科技作品」，燈登登櫈，就係機械旁證（ROBO Linesmen）喇！呢個機械旁證系統，其實喺之前世冠盃同阿拉伯盃都用過，國際足協主席恩芬天奴，打算將呢項技術引入年底嘅卡塔爾世盃，希望改善越位誤判嘅問題。
VAR出現之後，無可否認係減少咗冤案，但同時有唔少矯枉過正嘅腳毛越位、標準不一等問題出現，為咗解決呢個問題，於是又有機械旁證嘞。
呢個機械旁證，配備10個鏡頭，對準球員身體上29個不同部份，然後製造出立體影像協助判決。恩芬天奴話，之前呢個系統喺試驗期間運作暢順，比起VAR判斷越位嘅時間更快更準。
暫時呢個構思，會喺fifa會議上再討論，估計順利通過嘅機會都好大。不過有球評家認為，其實VAR只要執行得好啲、劃一個標準，就已經可以解決越位問題，機械旁證根本就多餘。
著名球證哥連拿，亦對機械旁證技術有保留：「佢哋只係提供影像數據，講到底，球證同旁證都要作出決定、同時要為判決負上責任，尤其越位呢啲要快、要準嘅裁決，好困難。」嚟緊FIFA嘅球證訓練營，會更詳細咁講解同教導呢種技術畀球證。
而事實上，今屆世界盃堅有好多第一次，除咗機械旁證，亦將首次有女性主裁判執法男子世界盃；今屆被挑選嘅36位球證中，有3位係女性，分別係Stephanie Frappart、山下良美同Salima Mukansanga。同時，今屆亦係首次喺11月舉行、由阿拉伯國家主辦嘅世界盃。
