每個人都渴望回春，懷念青春少年時。雖然時間唔等人，仍然會用唔同方法，留住最美好時刻。你會用乜方法？而摩連奴就只有一個：足球！
執教曼聯、熱刺嗰陣，經常見到摩連奴顯露老態，情緒大上大落，時而憂鬱，忽然暴躁，年過五草，更年期到？
但自從上季轉投羅馬，唔駛再對住保羅普巴等麻煩大牌，亦無需應付利維呢種弄權老細，即使已59歲，往日我哋熟悉，激情、霸氣、笑容燦爛，兼而有之嘅摩佬，又再重現眼前。皺紋當然抹唔甩，但氣質，依然未變。
上季首度領軍，即助羅馬打破14年錦標荒，摩佬唔單止盡吐冤屈氣，亦再次享受勝利感覺，藥到回春。係，可能對普羅球迷嚟講，「唓，盃仔嚟啫，成日喺度J，收皮啦！」但對羅馬球迷嚟講，呢個係球會近60年來第一個歐洲冠軍。
「勝利感覺會令人上癮。若你喜歡足球，生活自然會圍繞佢而轉。如果你唔喜歡足球，贏冠軍後，只會攞完奬牌就走人。」
「當你深愛足球，你絕對唔會覺得自己變老，反而經常充滿活力，正正係呢股動力，令人可以回春。」摩佬日前接受Sky Sport訪問嗰陣咁講。
外界經常話，摩佬天生領䄂，好多球員肯為佢賣命，但佢話自己只係邊做邊學。
「我唔係天生領䄂，年輕時我選擇沉默，但環境唔容許，我經常要透過傳媒表達自己，令到某啲事出現不同發展。我認為領䄂代表一種責任，唔好令人失望。同時要同球員一齊工作，要為佢哋著想，信任就會建立。真誠對人，球員感受得到。」
