韋利安返英超搵食？曾經踢過車路士、阿仙奴嘅巴西名將韋利安，返巴西哥連泰斯後表現不似預期，尋日仲自爆收到恐嚇，已即時同球隊解約。目前自由身嘅佢，據指得到富咸垂青，有望重返英超搵食！
34歲嘅韋利安，係上一代英超迷嘅回憶之一，速度飛快、有技術，而且唔獨食，2013年轉投車路士後，擸勻英超、足總盃同聯賽盃，亦幫過車仔捧歐霸，可惜2020年轉投阿仙奴後一沉不起，舊年雙方同意提早解約，韋利安亦重返母會哥連泰斯。
返到哥連泰斯後，韋利安被球迷們寄予厚望、當神咁拜，不過呢位巴西名將真係走下坡，根本交唔番當年嘅水準，45次披甲只入1球，助攻亦唔多，一批激進嘅哥連泰斯球迷嬲到爆炸，仲對韋利安發死亡恐嚇！
被恐嚇嘅唔單止係韋利安，仲波及埋佢老婆、囡囡同老竇，喺不斷被滋擾下，韋利安決定提前解約：「我返巴西踢波唔係為咗畀人恐嚇，依家講緊嘅係我父親、太太、女兒不斷被恐嚇、被網上欺凌，呢個時候，仲可以唔走咩？」
哥連泰斯會方亦體諒韋利安嘅情況，已接受呢位巴西翼鋒嘅申請，即日生效，換言之，韋利安已經係自由身球員。
消息一出，轉會權威Romano已指韋利安希望重返歐洲，據指英超升班馬富咸已與其接洽，希望佢嘅經驗同多年英超打滾嘅即戰力，幫到球隊護級。
富咸喺英超開鑼戰一鳴驚人，以2:2賽和利物浦，王牌中鋒米祖域更入兩粒，如果有埋韋利安嘅輔助同助攻，米祖域會唔會更如魚得水？富咸今晚將會作客狼隊，近3次對賽，狼隊都係贏1:0。
