'

【特稿】懷緬智利孖寶 兩挫阿根廷最爽

近兩季國際米蘭於聯賽分別取得冠亞軍,一對智利國腳維達爾及阿歷斯山齊士當然有功勞。來到22/23年球季,兩位都離開米蘭市。維達爾就重返南美,加盟巴甲法林明高。至於A山就留守歐陸,轉投法甲馬賽。

踢防中嘅維達爾成名於利華古遜,2011年暑期去到祖雲達斯更大放異彩,協助球隊4奪聯賽冠軍以及歐聯亞軍。2015年重返德甲加盟拜仁依舊出色,添多3屆德甲冠軍。再去到西甲巴塞隆拿,贏埋個西甲冠軍。咁即係話由2011/12年去到2018/19年球季,維達爾從未斷過聯賽冠軍名銜,要砌到呢個咁靚嘅數據都真係唔容易。

數獎盃,A山確係唔及維達爾咁多。但因佢踢較搶鏡嘅中前場位置,而且效力過阿仙奴及曼聯兩間英超名牌,論知名度一定喺維達爾之上。A山成名於烏甸尼斯,之後去到巴塞及阿仙奴都有好表現交出。走位靈活反應又快,無論助攻或主攻都一樣咁出色。但去到曼聯就嚴重退步,加上受傷患影響,表現遠差預期。幸好佢走得快,重返意大利加盟國米,仲畀佢執多個聯賽冠軍。

維達爾與A山,後生時曾經於智利班霸高路高路做過隊友,估唔到去到球員生涯尾聲,又喺國米重逢。所以話緣份就係咁得意。而講到印象最深刻,兩個都話係協助智利國家隊贏得2015及2016年美洲國家盃,兩次都喺決賽擊敗由美斯帶領嘅阿根廷。呢壇國際賽威水史,真係講一世都繼續講。