泰國球迷真幸福，有場咁勁嘅熱身賽睇，一隊已經唔得了，仲要打孖嚟，係曼聯對利物浦呀！戰果亦算出人意表，曼聯大勝4:0，新領隊坦哈格有個好開始，亦同時向外界宣示，其實冇C朗都得？！
利物浦領隊高普賽前話，雙紅會永遠唔會係熱身賽咁簡單，但佢講一套做一套，特別係防線，高美斯打中堅，其他都係新人，中場有神軒，前面就用路爾斯戴亞斯拍羅拔圖法明奴，由富咸加盟嘅法比奧卡華奴亦任正選，沙拿、祖達同新中鋒達雲紐尼斯都先收起。
相比利物浦，曼聯上半場完全強陣出擊，除咗冇隨隊嘅C朗，基本上出齊主力。坦哈格上任後，全力操體能，球員狀態確實唔錯，上半場可以做到全場緊逼，跑動極多，同上季懶散態度，面貌有明顯改變。
面對半力都冇嘅利物浦，曼聯嘅穩守突擊相當有效，辛祖、馬迪爾、拉舒福特足以拉散紅軍防線，結果辛祖、費特、馬迪爾先後入波，上半場已領先3:0。
曼聯上半場演出，可以暫時為新球季定調，強調圍搶、快速傳球、高速突破，將會相當體力化，C朗即使留隊，可唔可以適應到？
利物浦今仗明顯hea踢，懸殊戰果冇啟示性，全場不停輪換，戰意、狀態都非常不足。下半場中段換入沙拿、雲迪積克、達雲紐尼斯，主要都係熱吓身同向現場觀眾交代，沙拿好似未瞓醒，睇樣都知佢攰到飛起，但完場前都騷吓哥利，左腳射遠柱，睇怕必入但中柱彈出，達雲紐尼斯補射亦打飛機。
曼聯76分鐘入夠4:0，來自一個後場發動嘅快速反擊，由幾位後備入替嘅年輕小將一手完成，入球者係20歲烏拉圭小將Facundo Pellistri，呢個由一班小將炮製嘅士哥，某種程度上亦為坦哈格紅魔地標戰，增添另一種意義，喺買人屢次受挫下，相信重用小將亦會係佢改革之路嘅重要方向之一。
