有港人第二最愛之稱嘅澳職，今日開咧喇！揭幕戰由上季總冠軍中岸水手，作客阿德萊德聯。上季中岸水手以爆冷姿態，喺總決賽以6:1橫掃墨爾本城、勇奪季後賽王者寶座，令人打咗個突。嚟到今季，各路雄師有咩動作？呢個聯賽又應該點玩？
1.入波多、玩走地
講真，澳職平均水準的確唔高，但勝在時間靚、入波多，睇落的確係刺激嘅。以上季嚟計，12隊波當中，有8隊場均入球係超過3球，最多係阿德萊德聯同墨爾本城（3.66球），就算係場均入球最少嘅布里斯班獅吼，都有2.27球。由於澳職多數有即場，所以只要當中位數去到2.5球、又或者你心目中嘅理想水位，大可出手碰吓運氣。
2.7+陷阱
入波咁多，鍾意高賠率嘅朋友，好容易陷入「總入球7+」嘅陷阱。事實上，上季嚟計，阿德萊德聯同墨爾本城曾經開過2次「7+」，已經係澳職之最，其餘中岸水手、麥克阿瑟、珀斯光輝同西悉尼流浪者都只係開過1次，剩番嗰6隊就未開過，可見長追「7+」冇乜著數。
3.角球大
除咗入波多，角球一樣咁多。澳職大部份球隊都係用典型中鋒配兩翼出波側擊，所以好易拎到角球，上季澳職12隊，平均角球數由最少嘅9.5球（墨爾本勝利）、去到最多嘅13球（阿德萊德聯），當中有10隊係超過10球，換句話講，當開波冇耐就見到角球中位數去到10球的話，就係出手嘅好時機。
4.今季銀行隊
由於澳職守將水準參差，往往只要一個有級數嘅球星喺前面搵食，就可以帶起成隊波。以往嘅例子有好多，近代啲嘅有占美麥卡倫、方祖、科拿路利等等，今季要留意中岸水手嘅古奧同麥克阿瑟嘅謝明。22歲嘅古奧早兩季喺澳職一鳴驚人，速度快到得人驚，可惜去到史特加後發展麻麻，今季回流水手，經驗同級數比以往更高，肯定會有作為。
至於謝明則踢過馬賽、摩納哥同蒙彼利埃，呢位33歲前鋒亦不負盛名，喺亞協盃兩戰，為麥克亞瑟轟入3球，踢澳職超晒班，預計麥克阿瑟喺聯賽早段嘅盤唔會太辣，值得留意吓。
