半個月前，PSG喺足總盃畀馬賽踢出局，到尋晚法甲國家打吡兼榜首大戰，巴黎聖日耳門憑兩大球王嘅精彩演出，以3比0復仇成功，將積分差距拉開至8分，總算爭番口氣。
PSG喺法甲領放都唔係咩新聞，不過今場波嘅特別之處，係兩大球王美斯同麥巴比嘅默契，已經昇華到去最佳拍檔級別，美斯助攻麥巴比x2，麥巴比又助攻番畀美斯，二人包辦晒3個入球，玩晒啦你哋！
尼馬、夏基美今場都因傷避戰，雖然PSG今場殘陣出擊，初盤更一度開出平手盤高水，不過踢落始終係兩個唔同級數，25分鐘，美斯靚直線，麥總禁區右路攞遠柱，1比0。4分鐘後，麥巴比後踭傳球，紐奴文迪斯配合再交番畀麥總，麥總喺左路用右腳傳中，美斯門前搞掂，2比0。
上半場PSG其實大把餐士，美斯有球門前炒高，麥總亦有球單刀失機，如果把握到的話 ，隨時上半場已領先4球。
不過都唔緊要嘅，換邊後麥總同美斯又炮製金球，麥總喺禁區頂交畀美斯，然後即時走位入楔，美斯神傳撩高個波，麥總第一時間抽射入網，PSG最終輕鬆大勝3比0。
美斯今場攻入第700個5大聯賽入球，成就解鎖，而佢今季12次助攻，亦同曼城嘅奇雲迪布尼並列5大聯賽第一位。至於麥總，亦射入佢喺PSG嘅第200球，同卡雲尼並列球會史上射手王。美中不足嘅係，甘佩比今場因傷退下火線，初步估計要提早收咧。
香港時間今晚凌晨4點，FIFA將會頒發年度最佳球員獎，最後3強為美斯、麥巴比及賓施馬，一般估計，美斯將毫無懸念、7度登基。
